جىلداعىداي كۇزدە ەمحانالارعا تىركەلۋ ناۋقانى باستالدى. 15 قىركۇيەكتەن باستاپ ەلوردا تۇرعىندارى دا ءوز ەمحانالارى مەن دارىگەرلەرىن تاڭداۋدا. مامانداردىڭ ايتۋىنشا ەمحاناعا تىركەلمەسەڭىز, جوسپارلى مەديتسينالىق كومەككە قول جەتكىزۋدە قيىندىقتار تۋىندايدى. ازاماتتار تاراپىنان وسىعان وراي قويىلاتىن ساۋالداردىڭ ەڭ باستىلارىنا ماماندار جاۋاپ بەردى.
ەمحاناعا تىركەلۋ نە ءۇشىن قاجەت؟
شۇعىل مەديتسينالىق كومەكتەن بولەك جوسپارلى تۇردە دارىگەرگە دەيىنگى نەمەسە دارىگەرلىك كومەك الۋ ءۇشىن ەمحاناعا تىركەلۋ كەرەك. ءار ادام ءوزىنىڭ ۋچاسكەلىك دارىگەرىن ءبىلۋى ءتيىس. ەگەر پاتسيەنت ەمحاناعا تىركەلگەن بولسا, جالپى پراكتيكا دارىگەرىنىڭ/تەراپەۆتتىڭ قابىلداۋى, بەيىندى ماماننىڭ كونسۋلتاتسياسى, دياگنوستيكالىق جانە زەرتحانالىق تەكسەرۋ, كونسەرۆاتيۆتى نەمەسە حيرۋرگيالىق ەمەس ەمدەۋ, سونداي-اق كۇندىزگى ستاتسيونار قىزمەتتەرى پاتسيەنتكە تەگىن مەديتسينالىق كومەكتىڭ كەپىلدىك بەرىلگەن كولەمىندە, سونداي-اق الەۋمەتتىك مەديتسينالىق ساقتاندىرۋ جۇيەسىندە كورسەتىلەدى.
قايدا تىركەلۋگە بولادى؟
مەديتسينالىق-سانيتاريالىق العاشقى كومەك كورسەتەتىن, سونداي-اق پروفيلاكتيكالىق سكرينينگتەر مەن تەكسەرۋلەر جۇرگىزەتىن مەديتسينالىق ۇيىمدارعا عانا تىركەلۋگە بولادى. ولارعا: قالالىق ەمحانالار, دارىگەرلىك امبۋلاتوريالار, فەلدشەرلىك-اكۋشەرلىك پۋنكتتەر, وتباسىلىق دەنساۋلىق ورتالىقتارى جاتادى. تۇرعىلىقتى جەرى, جۇمىس نەمەسە وقۋ ورنى اۋماعى بويىنشا ءبىر عانا مەديتسينالىق ۇيىمعا تىركەلۋ مۇمكىندىگى بار. ال قالا ماڭىندا تۇراتىندار جاقىن ورنالاسقان قالالىق ەمحاناعا تىركەلە الادى.
تىركەلۋ كەزىندە نەگە نازار اۋدارامىز؟
مەديتسينالىق ۇيىم الەۋمەتتىك مەديتسينالىق ساقتاندىرۋ قورىمەن قىزمەت جەتكىزۋشى رەتىندە شارتقا وتىرعان با جانە ەكى تەگىن پاكەت – تمككك جانە ءمامس اياسىندا, ونىڭ ىشىندە قوسالقى مەردىگەرلىك شارت بويىنشا مەديتسينالىق قىزمەتتەر كورسەتە مە, وسىلارعا نازار اۋدارۋ قاجەت. ايتپەسە, ءسىز كەپىلدەندىرىلگەن جانە مەديتسينالىق ساقتاندىرۋ پاكەتتەرىن پايدالانا المايسىز.
قالاي تىركەلۋگە بولادى؟
بۇگىنگى تاڭدا ءۇش ءتۇرلى ءتاسىل ارقىلى ەمحاناعا تىركەلۋگە بولادى. ءبىرىنشى ءتاسىل – ەمحانانىڭ تىركەۋ بولىمىنە بارىپ, ءوتىنىش جازۋ. بۇل ءتاسىل جاسى بويىنشا زەينەتكە شىققان زەينەتكەرلەرگە, مۇمكىندىكتەرى شەكتەۋلى ادامدارعا, بالالارعا, ونىڭ ىشىندە شەت مەملەكەتتەردە تۋعان بالالارعا, سابيلەر ۇيلەرىندە تۇراتىن بالالارعا, جەتىمدەرگە, سوتتالعاندارعا, كولونيالاردا جازاسىن وتەۋشىلەرگە جانە مەدرەسەدە وقيتىندارعا, مەرزىمدى قىزمەتتەگى اسكەري قىزمەتشىلەرگە نەمەسە سەنىمحات بويىنشا تىركەلۋدى رەسىمدەۋشىلەرگە عانا قولجەتىمدى. ول ءۇشىن سىزگە جەكە كۋالىك, تولقۇجات نەمەسە تۇرۋعا رۇقسات قۇجاتى قاجەت. ەكىنشى ءتاسىل – حالىققا قىزمەت كورسەتۋ ورتالىعى ارقىلى ەمحاناعا تىركەۋگە ءوتىنىم بەرۋ. ءۇشىنشى ءتاسىل – ۇيدەن شىقپاي ەمحاناعا تىركەلۋ. بۇل رەتتە http://egov.kz. ەلەكتروندىق ۇكىمەت پورتالى ارقىلى ءوتىنىم بەرۋ جەتكىلىكتى.
قانداي قۇجاتتار قاجەت؟
جەكە كۋالىك جەتكىلىكتى. ال ساناتتارىنا قاراي ۇسىنىلاتىن قۇجاتتار: زەينەتكەرلەر ءۇشىن – زەينەتاقى كۋالىگى, مۇمكىندىگى شەكتەۋلى ادامدار ءۇشىن – كۋالىگى نەمەسە مەديتسينالىق-الەۋمەتتىك ساراپتامانى كۋالاندىرۋ اكتىسىنەن ءۇزىندى كوشىرمە. كولونيالاردا جازاسىن وتەپ جاتقان سوتتالعاندار جانە اسكەري قىزمەتشىلەر – مەديتسينالىق-سانيتاريالىق العاشقى كومەك ۇيىمىنا تۇرعىنداردى تىركەۋ ماسەلەلەرىن قاراۋ جونىندەگى كوميسسيانىڭ حاتتاماسى.
كەز كەلگەن ۋاقىتتا تىركەلۋگە بولا ما؟
مەديتسينالىق ۇيىمعا كەز كەلگەن ۋاقىتتا تىركەلۋگە بولادى. ەگەر ءسىز تۇرعىلىقتى جەرىڭىزدى اۋىستىرعان بولساڭىز, قالادان تىس جەرگە ءبىر ايدان استام مەرزىمگە كەتسەڭىز نەمەسە العاش رەت ەركىن تاڭداۋ نەمەسە تىركەلۋ قۇقىعىن پايدالانام دەپ شەشسەڭىز, سونداي-اق تىركەۋ ءسىز جوقتا جاسالعان بولسا, ەمحاناڭىزدى اۋىستىرىڭىز. سونداي-اق مەديتسينالىق ۇيىم قايتا ۇيىمداستىرىلعان نەمەسە تاراتىلعان, الەۋمەتتىك مەديتسينالىق ساقتاندىرۋ قورىمەن شارت بۇزىلعان جاعدايدا نەمەسە ۇيىڭىزگە جاقىن جەردە جاڭا ەمحانا اشىلسا, تىركەلىڭىز. ساقتانۋشى مەن ساقتاندىرۋ ۇيىمى اراسىندا جاسالعان ەرىكتى مەديتسينالىق ساقتاندىرۋ شارتى دا ناۋقان شەڭبەرىنەن تىس تىركەلۋگە نەگىز بولماق.
تىركەۋدەن باس تارتۋى مۇمكىن بە؟
ەگەر ءسىزدىڭ تۇرعىلىقتى جەرىڭىز تىركەلگىڭىز كەلەتىن ەمحانانىڭ قىزمەت كورسەتۋ اۋماعىنا جاتپاسا, بىراق ءسىز «دارىگەردى ۇيگە شاقىرۋ» قىزمەتىنەن باس تارتپايتىن بولساڭىز, ەمحاناعا تىركەمەۋى مۇمكىن. سەبەبى ءموبيلدى بريگادانى نەمەسە ۋچاسكەلىك دارىگەردى ۇيگە شاقىرعان كەزدە ولار سىزگە كەلە المايدى جانە كومەك كورسەتە المايدى, ويتكەنى ءسىز ولاردىڭ قىزمەت كورسەتۋ ايماعىنان تىس جەردە تۇراسىز. ال ەگەر بۇل جايلارعا كەلىسىپ, ەمحاناعا ءوزىم كەلىپ قارالامىن دەسەڭىز جانە ولار ءسىزدى قابىلداۋعا دايىن بولسا, ەمحاناعا تىركەيدى. وندا ءسىز وسىعان بايلانىستى بارلىق تاۋەكەلدەردى ءوز جاۋاپكەرشىلىگىڭىزگە الاسىز. بالالاردى تىركەگەن جاعدايدا, زاڭدى وكىلدىگىن راستايتىن قۇجاتتىڭ بولماۋى نەمەسە پاتسيەنت مەملەكەتتىك قىزمەتتى الۋ ءۇشىن ۇسىنعان قۇجاتتاردىڭ, ولارداعى دەرەكتەردىڭ دايەكسىزدىگى ەمحاناعا تىركەۋدەن باس تارتۋ ءۇشىن نەگىز بولا الادى. سونداي-اق ەمحاناعا تىركەلگەن تۇرعىندار سانى ءبىر جالپى پراكتيكا دارىگەرىنە بولگەندە ارالاس تۇرعىنداردان 1700 ادامنان, ۋچاسكەلىك تەراپەۆتتە 2200 ادامنان, ۋچاسكەلىك پەدياتردا 6 جاسقا دەيىنگى 500 بالادان, 14 جاسقا دەيىنگى 900 بالادان اسىپ كەتۋ سەبەبىنەن ەمحاناعا تىركەۋدەن باس تارتۋى مۇمكىن.
