وتكەن جىلى ەلوردادا 1 ميلليون تەڭگەنى قۇرايتىن 465 تۇرعىن ءۇي سەرتيفيكاتى بەرىلدى. ونىڭ 400-ءى بيۋدجەت قىزمەتكەرلەرىنىڭ قولىنا ءتيدى. «باقىتتى وتباسى» باعدارلاماسى بويىنشا 65 سەرتيفيكات تاپسىرىلدى. نۇر-سۇلتان قالاسى ءماسليحاتىنىڭ كەزەكتى سەسسياسىندا وسىلاي دەپ مالىمدەگەن قالالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى اسىلبەك ەسەنباەۆ وسى ماسەلە بويىنشا ءتۇسىپ جاتقان وتىنىشتەر كوپتىگىنەن سەرتيفيكات الۋشىلاردىڭ ساناتتارىن كەڭەيتۋدى ۇسىندى.
بۇل ساناتقا الەۋمەتتىك ءالجۋاز توپتارعا جاتاتىن بارلىق ازاماتتى, سونىڭ ىشىندە ءى, ءىى, ءىىى توپتاعى مۇگەدەكتەردى, زەينەتكەرلەردى, ۇلى وتان سوعىسىنا قاتىسۋشىلارعا تەڭەستىرىلگەندەردى, جەتىم بالالاردى, مىندەتىن ورىنداۋ كەزىندە قازا بولعان ازاماتتاردىڭ وتباسىلارىن قوسۋ ۇسىنىلىپ وتىر. قالانىڭ ناقتىلانعان بيۋدجەتىندە بۇل جۇمىستارعا 792 ميلليون تەڭگە سالىنعان. سوعان سايكەس 792 تۇرعىن ءۇي سەرتيفيكاتىن بەرۋ جوسپارلانعان. قالالىق ءماسليحات دەپۋتاتتارى بۇل ۇسىنىستى ءبىراۋىزدان قولدادى.
سونداي-اق اتالمىش باسقارما باسشىسى 153 ميلليون تەڭگە سوماسىنا جالپى اۋدانى 0,14 گەكتار اۋماقتى قۇرايتىن ەكى نىسان بويىنشا 63 جەر تەلىمىن ساتىپ الۋ شارتىمەن تانىستىردى.
– ساتىپ الىناتىن جەر تەلىمدەرى تاۋەلسىزدىك داڭعىلى مەن شارل دە گولل كوشەسى قيىلىسىندا جاپسارلاستىرا سالىنعان ورىنجايلار مەن پاركينگى بار كوپپاتەرلى تۇرعىن ءۇي كەشەنى قۇرىلىسىنا ارنالادى. ال ەكىنشى نىسان ش.قۇدايبەردىۇلى داڭعىلى مەن ماناس كوشەسى قيىلىسىنداعى تۋرا وسىنداي تۇرعىن ءۇي كەشەنى بولماق. جەر تەلىمدەرىنىڭ مەنشىك يەلەرى ۇسىنىلعان وتەماقى سوماسىمەن تانىستىرىلدى. ولاردىڭ جازباشا كەلىسىمدەرى بار, – دەدى بايانداماشى.
اتالعان جۇمىستارعا قاتىستى ماسەلەلەردى «ەلوردا قۇرىلىس» كومپانياسى ۇكىمەت بولگەن قارجى ەسەبىنەن رەتتەيدى. بۇل نىساندار اياقتالماعان ۇلەسكەرلىك قۇرىلىس ساناتىنا جاتادى.
قالالىق ورتا ساپاسى جانە باقىلاۋ باسقارماسىنىڭ باسشىسى داۋلەت دوسقۇلوۆتىڭ ايتۋىنشا, تۇرعىن ءۇي كەشەنىنىڭ اتاۋى «التىن بۇلاق». «نۇرلى جەر» باعدارلاماسىنىڭ اياسىندا ونىڭ قۇرىلىسىنا گاراجدار مەن ساياجايلاردى ساتىپ الۋ جوسپارلانعان. ءتيىستى جۇمىستارعا قارجى سالىنعان. بۇل جاعىنان ەشقانداي ماسەلە تۋىنداپ وتىرعان جوق.
