استانادا تاڭداعان سالاسىندا قاجىرلى ەڭبەك ەتىپ, سول سالا ءۇشىن ماڭداي تەرىن اياماعان, ەلىمىزدىڭ تىرەگىنە اينالعان ارداقتى ەڭبەك ارداگەرلەرى ماراپاتتالدى.
ەڭبەك كۇنىنە ارنالعان رەسپۋبليكالىق فورۋمدا قر مەملەكەتتىك حاتشىسى گۇلشارا ابدىقالىقوۆا كسرو حالىق ءارتىسى, كسرو جانە قازاقستاننىڭ مەملەكەتتىك سىيلىعىنىڭ لاۋرەاتى بيبىگۇل تولەگەنوۆاعا «ەڭبەك ارداگەرى» مەدالىن تابىستادى.
سالتاناتتى جيىننىڭ شىمىلدىعىن اشقان گۇلشارا ابدىقالىقوۆا ءار ادامنىڭ ەڭبەگى ءار ۋاقىتتا باعالى ەكەندىگىن جەتكىزدى.
– ءبىز 2014 جىلدان باستاپ ەڭبەك كۇنىن اتاپ وتەمىز. بۇل مەرەكە – وتانىمىزدىڭ ءوسىپ-وركەندەۋىن قامتاماسىز ەتەتىن حالىقتىڭ ەڭبەگىنە دەگەن قۇرمەتتىڭ بەلگىسى. سونداي-اق, بۇل كۇن الەۋمەتتىك جانە ەكونوميكالىق جەتىستىكتەرىمىزدى دارىپتەۋگە ارنالعان. ەلىمىزدىڭ ءاربىر ازاماتى ادال, رياسىز, ءونىمدى ەڭبەكتىڭ ماڭىزدىلىعىن ساناسىنا ءسىڭىرۋى كەرەك. سوندا عانا قازاقستان الەمدەگى وزىق ەلدەردىڭ قاتارىنا قوسىلادى. كەلەشەكتە ۇلتتىڭ تابىستىلىعى ادامي كاپيتالدىڭ ساپاسىمەن ولشەنەدى, – دەي كەلە بىرقاتار ەڭبەك ارداگەرلەرىنە
قۇرمەت كورسەتىپ, ماراپاتتادى. وسىلايشا, ۇزدىك ەڭبەك اۋلەتى بولىپ جۇبانىشوۆتار اۋلەتى تانىلدى. ولار 420 جىل بويى
«قازاقستان تەمىر جولىندا» جۇك تاسىمالى سالاسىندا جۇمىس ىستەپ كەلە جاتىر.
سونىمەن قاتار تىلەك حارين, نۇرسۇلتان ابباسوۆ جانە نۇرجامال تولەۋوۆا نوميناتسيالار بويىنشا ماراپاتتالدى.
كەلەسى بولىپ ءسوز سويلەگەن ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەڭبەكقور ازاماتتاردىڭ جەمىستى جۇمىسىنا توقتالدى.
– بۇگىن – ەلىمىزدىڭ ەكونوميكاسىنىڭ ءتۇرلى سالالارىندا قىزمەت ەتىپ كەلە جاتقان 8,5 ملن استام ازاماتتىڭ ايتۋلى مەرەكەسى. ەلباسى ءوزىنىڭ «جالپىعا ورتاق: ەڭبەك قوعامىنا قاراي جيىرما قادام» اتتى ماقالاسىندا الەمدىك وركەنيەتتىڭ بارلىق قۇندىلىعى, بارلىق ەكونوميكالىق جانە مادەني بايلىعى ۆيرتۋالدى قارجى ينستيتۋتتارىنىڭ ەمەس, ادامنىڭ ەڭبەگىمەن جاسالادى دەگەن بولاتىن. راسىندا دا, ەگەمەندىگىمىزدى العاننان كەيىنگى شيرەك عاسىرعا كوز جۇگىرتەتىن بولساق, ەلىمىزدە 7,5 مىڭ شاقىرىم جول سالىنىپ, 113 ملن شارشى مەتردەن استام تۇرعىن ءۇي قولدانىسقا بەرىلسە, 3000-عا جۋىق مەكتەپ پەن دەنساۋلىق ساقتاۋ نىساندارى سالىنىپتى. ال وندىرىلگەن جالپى ىشكى ءونىمنىڭ كولەمى 1993 جىلعى 29,4 ملرد تەڭگەدەن بىلتىر 47 ترلن تەڭگەگە دەيىن جەتتى. وسى ناتيجەلەردىڭ ارقاسىندا بۇگىندە قازاق ەلىن الەمدىك قوعامداستىق نارىقتىق ەكونوميكاداعى مەملەكەت رەتىندە تانىپ وتىر. بۇل مەرەكە – ەڭبەكشى ازاماتتاردىڭ عانا ەمەس, بۇگىندە بەينەتىنىڭ زەينەتىن كورىپ وتىرعان 2,5 ميلليوننان استام ەڭبەك ارداگەرىنىڭ دە ءتول مەرەكەسى, – دەدى مينيستر.
گۇلدانا تالعاتقىزى
