استانادا مەملەكەتتىك قىزمەتكەرلەر ءۇشىن جاڭا ەڭبەكاقى تولەۋ جۇيەسىن ەنگىزۋ, سونداي-اق ونىڭ ورىندالۋ بارىسى تالقىلاندى.
ەڭبەكاقى تولەۋ جۇيەسى سوڭعى رەت 14 جىلدان اسا ۋاقىت بۇرىن ەنگىزىلگەن. ياعني بۇگىنگە دەيىن ايلىق تولەم قىزمەتكەرلەردىڭ جۇمىس ءوتىلى بويىنشا تولەنىپ كەلگەن. جيىن بارىسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ايگۇل شايىموۆانىڭ ايتۋىنشا, مينيسترلىك قىزمەتكەرلەرى مەن جەرگىلىكتى اتقارۋشى بيلىك ورگاندارىنىڭ جۇمىسشىلارى اراسىنداعى جالاقى ايىرماشىلىعى 75 پايىزدى قۇرايدى. ال جاڭا جۇيە قازىرگى ۋاقىتقا دەيىن بايقالعان پروبلەمالاردىڭ الدىن الماق.
– جىل باسىنان بەرى كۇردەلى جۇمىستار جۇرگىزىلدى. قازىرگى ۋاقىتتا بىرنەشە مەملەكەتتىك ورگاندا قاناتقاقتى جوبا جۇرگىزىلىپ جاتىر. اتاپ ايتقاندا, ادىلەت مينيسترلىگى, ماڭعىستاۋ وبلىسىنىڭ اكىمدىگى, سونداي-اق استانا قالاسىنىڭ اكىمدىگى. وسى بويىنشا ناقتى ناتيجەلەرگە قول جەتكىزدىك. بىزدە مەملەكەتتىك قىزمەتتەن شىعۋ كورسەتكىشى ەكى ەسەگە ازايدى. بۇعان قوسا, جاڭا كادرلار سانى كوبەيدى, – دەدى ايگۇل شايىموۆا.
تالقىلاۋ بارىسىندا ءتورت ورگانداعى تيىمدىلىكتەر تۋرالى ايتىلدى. بۇل رەتتە ەكونوميكالىق جاعىنان ءتيىمدى تۇستارىن استانا قالاسى مەن ماڭعىستاۋ وبلىسىنىڭ اكىمدىكتەرى كورسەتكەن.
