مەملەكەت باسشىسى قاسىم-جومارت توقاەۆ الەۋمەتتىك سالاعا قاتىستى ءبىرشاما وزگەرىس ەنگىزدى.
«رەفورما جۇرگىزگەن كەزدە الەۋمەتتىك كومەكتىڭ كىمگە جانە قالاي بەرىلەتىنىن تۇگەل قايتا قاراۋ قاجەت. ياعني, بولىنگەن قارجىنى بارىنشا ءتيىمدى جۇمساپ, ونى شىن مانىندە كومەككە مۇقتاج ادامعا بەرۋ كەرەك. قازىرگى تاڭدا ءتورت جارىم ميلليونعا جۋىق ادام مەملەكەتتەن الەۋمەتتىك كومەك الادى. بۇل – شامامەن ەلىمىزدىڭ ءاربىر بەسىنشى تۇرعىنى دەگەن ءسوز. باسىم كوپشىلىگى – ەڭبەككە جارامدى ازاماتتار. حالىققا الەۋمەتتىك كومەك بەرەمىز دەپ, ءبىز, شىنى كەرەك, قوعامدا ماسىلدىق پسيحولوگياعا جول بەردىك. وركەنيەتتى ەل بولامىز دەسەك, مۇنداي جاعىمسىز ۇدەرىسكە توسقاۋىل قويۋىمىز كەرەك. تۇراتىن ءۇيى, ءتىپتى, استىندا قىمبات كولىگى بار ازاماتتارعا ەمەس, كومەككە ءزارۋ ادامدارعا كومەك بەرىلۋى قاجەت. جالپى, ازاماتتارعا الەۋمەتتىك قولداۋ كورسەتۋ جۇيەسىن قايتا قاراعان ءجون» دەدى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ.
پرەزيدەنت مەديتسينالىق ينفراقۇرىلىمدى دامىتۋدىڭ ماڭىزى زور ەكەنىن اتاپ ءوتتى. الايدا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ اياسىندا جوسپارلانعان 655 نىساننىڭ تەك 85-ءى عانا پايدالانۋعا بەرىلگەن. سونداي-اق جاڭا فورماتتاعى 369 مەكتەپتى پايدالانۋعا بەرۋ جوسپارلانعان بولاتىن. بىراق تەحنيكالىق قۇجاتتاردى ۋاقىتىلى دايىنداۋدا جانە جەر ۋچاسكەلەرىن بولۋدە قيىندىقتار تۋىنداپ تۇر. مەملەكەت باسشىسى وسىعان قاتىستى ۇكىمەتكە, اكىمدەرگە جانە «سامۇرىق-قازىنا» قورىنا «دەنساۋلىق ساقتاۋدى جاڭعىرتۋ» جانە «جايلى مەكتەپ» ۇلتتىق جوبالارىن ىسكە اسىرۋعا كەدەرگى كەلتىرەتىن بارلىق ماسەلەنى شەشۋدى تاپسىردى.
ەرلان داكەنوۆ,
استانا قالاسى
ءماسليحاتىنىڭ دەپۋتاتى
