«ادەمى» ارداگەرلەر ءانسامبلىنىڭ ەلوردانىڭ الماتى اۋدانى بەلسەندى ۇزاق ءومىر ءسۇرۋ ورتالىعىنىڭ جانىنان قۇرىلعانىنا ەكى جىلعا جۋىقتادى. زەينەتكەرلەردەن قۇرالعان, ءارتۇرلى مۋزىكالىق اسپاپتاردا ويناپ, ءان سالاتىن, جانىنان ولەڭ شىعاراتىن ونەر ۇجىمى مۇشەلەرىنىڭ جالپى سانى – قازىر 34. سونىڭ ەڭ ۇلكەنىنىڭ جاسى – 78-دە. ءانسامبلدىڭ كوركەمدىك جەتەكشىسى – جالدىباي بايعاراۇلى.
«انسامبل مۇشەلەرى – جۇرەكتەرى ءان دەپ سوعىپ تۇرعان ادامدار. بىراق بۇرىن ساحنادا ءان سالىپ كورمەگەن. ونىڭ ۇستىنە ءبىزدىڭ كەزىمىزدە «ءارتىس بولامىن» دەسەڭ, اتا-انالارىمىز شوشىپ, ونەرگە جىبەرمەي قويعان جاعدايلار كوپ كەزدەستى. سودان تالانتى بولىپ تۇرسا دا, ىشتەگى ونەردى تۇنشىقتىرعان زامانداستارىمىز دا بار. سولار انسامبلگە كەلىپ, جاستىق شاقتارىنداعى ارماندارىن ورىنداپ جاتىر. جەتەكشىمىز جالدىباي بايعاراۇلى – وتە تالانتتى جىگىت, ساۋاتتى مۋزىكانت, سەگىز قىرلى, ءبىر سىرلى ازامات. ءوزى ءارتۇرلى اسپاپتاردا وينايدى. قازىر سول كىسى بىزگە ۇستاز بولىپ وتىر. ءبىز سياقتى ۇلكەن كىسىلەردىڭ ءتىلىن تابۋ وڭاي ەمەس قوي, جالدىباي بايعاراۇلى مول تاجىريبەسىنىڭ, شىدامدىلىعىنىڭ ارقاسىندا ءبارىمىزدى ءبىر ىسكە جۇمىلدىرىپ وتىر. بىزگە ەرلى-زايىپتىلار دا كەلەدى. قازىر ءتورت جۇبىمىز بار» دەيدى ءانسامبلدىڭ جەتەكشىسى رايگۇل وسپانقۇلوۆا.
ونىڭ ايتۋىنشا, انسامبل قۇرامى ءتۇرلى ماماندىق يەلەرىنەن, ءار سالانىڭ بۇرىنعى قىزمەتكەرلەرىنەن قۇرالعان. اراسىندا زاڭگەر دە, مۇعالىم دە, دارىگەر دە, ەكونوميست تە, بانك قىزمەتكەرى دە كەزدەسەدى. ونەرگە ەش قاتىسى جوق سالالاردا قىزمەت ەتكەن ادامداردان انسامبل انشىلەرىنەن بولەك, دومبىراشىلار, قوبىزشىلار, سازسىرنايشىلار, دابىلشىلار توبى قۇرىلدى.
«بۇرىن «ارقا اۋەندەرى» ءانسامبلى قۇرامىندا بولدىم. وندا ءتورت جىلداي ءان سالدىم. وتكەن جىلدىڭ قاراشا ايىندا جۇبايىممەن بىرگە «ادەمىگە» اۋىستىق. ونەر ۇجىمىندا قالىپتاسقان اۋىزبىرشىلىك, تاتۋلىق, جىلۋلىق وزىنە باۋراپ الادى. كەيدە ءبىر جارىم ساعاتتان ءۇش ساعاتقا دەيىن كونتسەرتكە دايىندالامىز. سونىڭ وزىندە ەش شارشاماي, كەرىسىنشە دەمالىپ شىعامىز. ورتانىڭ اۋراسى بولەك» دەيدى وركەستر مۇشەسى يبراگيم بەيسەنبايۇلى.
«ادەمى» انسامبلىنە قابىلدانعاننان كەيىن ومىرگە قۇشتارلىعى ارتقان, ونەر قۇدىرەتى ىشتەگى قايعىنى سەيىلتكەن ادامدار دا بار. انسامبل مۇشەلەرى تەك ونەردى عانا ناسيحاتتاماي, ۇلتتىق قۇندىلىقتاردى دارىپتەيدى. سونىڭ ىشىندە ۇلتتىق كيىمگە ەرەكشە كوڭىل بولەدى. كيىمگە, اشەكەي بۇيىمدارعا ءوز ەسەبىنەن تۇركياعا دەيىن تاپسىرىس بەرەدى.
انسامبل ورتا مەكتەپتەرمەن, «باقىتتى وتباسى» سەكىلدى الەۋمەتتىك ورتالىقتارمەن تىعىز بايلانىس ورناتقان. وسى مەكەمەلەردە كونتسەرتتەردى بەرىپ تۇرادى. ماسەلەن, جاقىندا سارىارقا اۋدانىنىڭ بەلسەندى ۇزاق ءومىر ءسۇرۋ ورتالىعى قىزمەتىن پايدالانۋشىلاردىڭ كوڭىلىن كوتەردى.
ادەبي-سازدى كەش فورماتىندا وتكەن كەش بارىسىندا ولەڭدەر وقىلىپ, اندەر مەن كۇيلەر اۋەلەدى. كونتسەرتتە حالىق اندەرى مەن حالىق كۇيلەرىمەن قاتار لاتيف حاميدي, نۇرعيسا تىلەنديەۆ, ءابىلاحات ەسپاەۆ سىندى قازاقتىڭ كلاسسيك جانە كەنتاۋ نازاربەك, حالىقبەرگەن ءابىلجانوۆ, قۇرال مولجانوۆ, يسلامحان بايگەسىنوۆ سەكىلدى قازىرگى كومپوزيتورلارىنىڭ اندەرى, ۇلەباي انەتۇلىنىڭ «دۋدار-ايى» مەن قوراباي ەسەنوۆتىڭ «جاس قالامى», قۇرمانعازىنىڭ كۇيلەرى ورىندالدى. مۋزىكالىق شىعارمالاردى كۇلان سۇلەيمەنقىزى, ايجامال دوسىمقىزى, جۇمابيكە كاتىمحانقىزى, يبراگيم بەيسەنبايۇلى, سەرىك قۇلماعانبەتوۆ, باقىتكۇل اقانقىزى, اماناي تولەۋۇلى, جالدىباي بايعاراۇلى, گۇلبارشىن سەيىتقىزى, مەڭدەش توعانقىزى, مارسيا راقىمبەردىقىزى ناقىشىنا كەلتىرىپ ورىندادى.
