كەشە «جانۇيا» وتباسى ينستيتۋتىن قولداۋ ورتالىعىندا نۇر-سۇلتان قالاسى اكىمىنىڭ ورىنباسارى باقتيار ماكەن «Samruk-Kazyna Trust» الەۋمەتتىك جوبالاردى دامىتۋ قورى ەلورداداعى ەرەكشە قاجەتتىلىكتەرى بار بالالارعا سىيعا تارتقان 11 ينۆواربانى تاپسىردى.
شاراعا جينالعانداردى تاۋەلسىزدىك كۇنى مەرەكەسىمەن قۇتتىقتاعان قالا باسشىسىنىڭ ورىنباسارى بۇل مەيرامنىڭ ءمان-ماڭىزىنا توقتالدى. قازاقستاننىڭ تۇڭعىش-پرەزيدەنتى نۇرسۇلتان نازارباەۆتىڭ ەگەمەن ەلىمىزدىڭ اياققا تۇرۋىنا قوسقان ۇلكەن ۇلەسىن, ەلباسى مەن مەملەكەت باسشىسى قاسىم-جومارت توقاەۆ ساياساتىنىڭ ساباقتاستىعىن اتاپ ءوتتى.
– مەملەكەت باسشىسى الەۋمەتتىك سالاعا زور كوڭىل ءبولىپ وتىر. قازىر مۇمكىندىگى شەكتەۋلى ازاماتتارعا, ەرەكشە قاجەتتىلىگى بار بالالارعا جاڭاشا كوزقاراسپەن قارايمىز. بۇگىندەرى قالامىزدا 26714 مۇمكىندىگى شەكتەۋلى ازامات تۇرسا, سونىڭ 5570-ءى – بالالار. قالا اكىمدىگى ولاردىڭ الەۋمەتتىك جاعدايىنا ءاردايىم سەرگەك قارايدى. جەلتوقسان ايىنىڭ باسىندا «قايىرىمدى قالا» اتتى ارنايى قايىرىمدىلىق اكتسياسىن باستادىق. ونىڭ اياسىندا كوپتەگەن الەۋمەتتىك جوبالاردى قولعا الدىق. سونىڭ ءبىرى – وسى شارا. «Samruk Kazyna» ۇلتتىق ءال-اۋقات قورى مەملەكەتتىك-جەكەمەنشىك ارىپتەستىك اياسىندا مۇقتاج ازاماتتارعا قامقورلىق تانىتىپ, ۇنەمى قول ۇشىن سوزادى» دەگەن ب.ماكەن اتالعان قوردىڭ كومەگىمەن قالادا اتقارىلعان جۇمىستارعا توقتالدى.
بەلگىلى بيزنەسمەن قايرات بورانباەۆ تا ءجيى ازاماتتىق تانىتىپ, كومەگىن بەرىپ تۇرادى. پاراوليمپيادالىق ورتالىقتىڭ بوي كوتەرۋىنە سەپتىگىن تيگىزدى. ەندى مەتسەنات قالادا ينۆاتاكسيدىڭ جەتىسپەۋشىلىگىنە بايلانىستى قوسىمشا تاعى وسىنداي 10 كولىك سىيعا تارتپاق. بۇيىرتسا, جاڭا ينۆاتاكسيلەر قاڭتار ايىندا تاپسىرىلادى. وسىنى ايتقان قالا باسشىسىنىڭ ورىنباسارى «جانۇيا» وتباسىن قولداۋ ورتالىعىنىڭ ازاماتتارعا بەرىپ وتىرعان جاردەمى تۋرالى ايتا كەلىپ, ينۆواربالاردى تاپسىرۋ ءراسىمىن وتكىزدى.
