ەلوردا ءماسليحاتىندا مادەني-الەۋمەتتىك دامۋ جونىندەگى تۇراقتى كوميسسيانىڭ وتىرىسى ءوتتى. نۇر-سۇلتان قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا ءوز سوزىندە قالاداعى تۇرعىن ءۇي كومەگىن كورسەتۋ ءتارتىبى مەن مولشەرىن انىقتاۋعا قاتىستى ماسەلەلەردى باياندادى.
باسقارما باسشىسى قالالىق ءماسليحاتتىڭ «الەۋمەتتىك كومەك كورسەتۋ, قالانىڭ مۇقتاج ازاماتتارىنىڭ جەكەلەگەن ساناتتارىنىڭ مولشەرىن بەلگىلەۋ جانە تىزبەسىن ايقىنداۋ قاعيدالارى تۋرالى» شەشىمىنە وزگەرىستەر مەن تولىقتىرۋلار ەنگىزۋدى ۇسىندى. ول كونستيتۋتسيا كۇنىنە وراي زەينەتكەرلەر مەن بىرجولعى جاردەماقى الۋشىلار اراسىنان سەمەيدەگى يادرولىق سىناقتاردان زارداپ شەككەندەرگە 2,5 اەك كولەمىندە بىرجولعى الەۋمەتتىك كومەك ەنگىزۋدى ۇسىندى. سونداي-اق ارداگەرلەرگە تەڭەستىرىلگەن اۋعانستانداعى سوعىس قيمىلدارىنا قاتىسقاندارعا, چەرنوبىل اەس اپاتىنىڭ زارداپتارىن جويۋعا قاتىسقان تۇلعالارعا اتاۋلى داتالاردا تولەنەتىن الەۋمەتتىك كومەكتىڭ كولەمىن 35 اەك-كە دەيىن ارتتىرۋدى ۇسىندى.
– سونىمەن قاتار قازاقستان رەسپۋبليكاسىنىڭ زاڭىندا بەلگىلەنگەن تارتىپپەن اقتالعان 1986 جىلعى 17-18 جەلتوقسانداعى وقيعالارىنا قاتىسۋشىلاردىڭ اراسىنان ساياسي قۋعىن-سۇرگىن قۇرباندارىنا ساناتوريالىق-كۋرورتتىق ەمدەۋمەن قامتاماسىز ەتۋدى جانە كوممۋنالدىق قىزمەت اقىسىن تولەۋدى قامتاماسىز ەتۋدى سۇرايمىز, – دەدى ساۋلە نۇرعوجينا.
الەۋمەتتىك ماڭىزى بار دەرتكە شالدىققان ادامداردى وتىنمەن قامتاماسىز ەتەتىن الەۋمەتتىك جاردەم الۋشىلار تىزىمىنە قوسۋ تۋرالى ءوتىنىش جاسالدى. «نۇر-سۇلتان قالاسىندا تۇرعىن ءۇي كومەگىن كورسەتۋ ءتارتىبى مەن مولشەرىن انىقتاۋ تۋرالى» ەرەجەگە وزگەرىستەر ەنگىزىلدى. وعان «مۇلىك يەلەرىنىڭ بىرلەستىگى» ۇعىمى ەنگىزىلىپ, «كوندومينيۋمدى باسقارۋ ورگانى» انىقتاماسى الىنىپ تاستالدى.
