ەرىكتىلەرگە گرانت بەرىلدى
قر ۇلتتىق مۋزەيىندە «ۆولونتەرلىك باستامالاردى قولداۋعا باعىتتالعان» شاعىن گرانتتار كونكۋرسىنىڭ جەڭىمپازدارىن ماراپاتتاۋ ءراسىمى ءوتتى.
«ەرىكتىلەردىڭ باستاماسىن قولداۋ ماقساتىندا گرانتتار ۇيىمداستىرعان بولاتىنبىز. كوميسسيا 200-دەن استام جوبالاردى قاراپ شىقتى. سونداي ەرەكشە باستامالاردىڭ ءبىرى – ليدەر.كز ۇسىنعان جوبا. ۆولونتەرلىك ۇيىم جوعالعان ادامداردى ىزدەيدى. ىزدەۋ جۇمىستارى ءۇشىن ولارعا درون, تەپلوۆيزور, 3 كم-گە دەيىنگى ارالىقتا ورىن كورسەتەتىن راتسيا سياقتى كومەكشى قۇرالدار كەرەك. وسى سەكىلدى كوپ جاقسى جوبالار كەلدى. الداعى ۋاقىتتا ۆولونتەرلەر وزدەرىنىڭ يگى ىستەرىن جۇزەگە اسىرادى دەپ ويلايمىز» دەيدى نۇر-سۇلتان قالالىق جاستار ساياساتى ماسەلەلەرى باسقارماسىنىڭ باسشىسى داۋلەت كارىبەك.
بايقاۋ ناتيجەسىندە ۇزدىك دەپ تانىلعان 22 ۆولونتەرلىك ۇيىم 300 مىڭ تەڭگە كولەمىندە قارجىلاي كومەك الدى. باسقارما باسشىسىنىڭ ايتۋىنشا, بۇل ماقساتقا 6 ملن تەڭگەدەن استام قارجى بولىنگەن. ۆولونتەرلىك ۇيىمدار العان قارجىلىق كومەكتى ءوز جوبالارىن ودان ءارى دامىتۋ ءۇشىن قاجەتتى قۇرالدار مەن جابدىقتاردى ساتىپ الۋعا باعىتتاۋى ءتيىس.