بيىل كەڭەس اسكەرىنىڭ شەكتەۋلى كونتينگەنتىنىڭ سوڭعى بولىمشەلەرى اۋعانستان شەكاراسىنان شىعارىلعانىنا 33 جىل تولادى. 1989 جىلى 15 اقپان كۇنى الاپات سوعىسقا نۇكتە قويىلىپ, قاسىرەتتى جىلدار تاريح قويناۋىندا قالدى.
وسى كۇنگە وراي ەلورداداعى №54 مەكتەپ-ليتسەيدە ۇلكەن شارا ۇيىمداستىرىلدى. شاراعا اۋعان سوعىسىنىڭ ارداگەرى باعلان باياحمەتوۆ, نۇر-سۇلتان قالاسى قورعانىس ىستەرى دەپارتامەنتى باستىعىنىڭ ورىنباسارى عاني ارتىقوۆ, «جاس سارباز» جاسوسپىرىمدەر اسكەري-پاتريوتتىق قوزعالىسىنىڭ ەلوردا بويىنشا توراعاسىنىڭ كەڭەسشىسى ايدارحان ماحامبەت, №54 مەكتەپ-ليتسەي ديرەكتورى ەسماعزام يسمۋحانوۆ جانە قوزعالىستىڭ وسى مەكتەپتەگى مۇشەلەرى قاتىستى.
جيىندى ەسماعزام يسمۋحانوۆ كىرىسپە سوزبەن اشىپ, قوناقتار مەن مەكتەپ وقۋشىلارىنا ىزگى تىلەگىن ءبىلدىردى. ودان كەيىنگى ءسوز باعلان باياحمەتوۆكە بەرىلىپ, جاۋىنگەر وت پەن وقتىڭ ورتاسىندا جۇرگەن كەزدەردەن سىر شەرتىپ, قارۋلاس دوستارمەن وت كەشكەن كۇندەردى ەسىنە الدى. سونداي-اق جاستارعا جۇرەكجاردى نيەتىن ءبىلدىرىپ, وتاندى ءسۇيىپ, ونى قورعاۋعا شاقىردى. زالعا جيىلعان وقۋشىلار دا باتىر اعالارىنا سۇراقتارىن قويىپ, ەستەلىكتەرگە قۇلاق ءتۇردى.
شاقىرىلعان مەيماندار كەزەگىمەن ءسوز الىپ, ءوز لەبىزدەرىن ءبىلدىردى. شارا بارىسىندا بەينەماتەريال كورسەتىلىپ, پاتريوتتىق باعىتتاعى اندەر شىرقالدى.
