استانا قالاسىندا «ەسىگىمدى قاققان كىم؟» اتتى درامالىق قويىلىم كورسەتىلەدى. 17 قازان كۇنى وقۋشىلار سارايىندا ساحنالاناتىن شىعارما قالا اكىمدىگىنىڭ قولداۋىمەن وتكىزىلگەلى وتىر.
اتالمىش تۋىندى بەلگىلى جازۋشى-دراماتۋرگ, پارلامەنت سەناتىنىڭ دەپۋتاتى جابال ەرعاليەۆتىڭ «جان شىرىلى» اتتى پەساسىنان ساحنالانعان. شىعارمادا سوڭعى ۋاقىتتاردا ەلدىڭ تىنىشتىعىن بۇزىپ وتىرعان تەرىس سيپاتتاعى اعىمدار مەن بىلمەستىكپەن قاۋىپتى جولعا ءتۇسىپ جاتقان جاستار جايى ايتىلادى. مۇنداي جاستاردىڭ ءومىرىن اۆتور ءدىني ەكسترەميستەردىڭ شەڭگەلىنە تاپ بولعان جاس وتباسى اسقار مەن گۇلنۇردىڭ باسىنان وتكەن وقيعالار ارقىلى جەتكىزگەن. بىلمەستىكپەن تەرىس جولعا ءتۇسىپ اداسقان ەكى جاس شەت ەل اسىپ, لاڭكەستەردىڭ ورداسىنا قالاي تۇسكەنىن بىلمەي قالادى. كوپ ۇزاماي وزدەرى تاپ بولعان توپتىڭ تۇپكى ماقساتى ءدىن ەمەس ادام ءولتىرۋ, توناۋ, زورلىق-زومبىلىق ەكەنىن سەزىپ قاتتى وكىنەدى. الايدا ءبارى كەش ەدى. لاڭكەستەردىڭ قولىنان بوساپ شىعۋ ەش مۇمكىن بولمايدى. «قويىلىمنىڭ نەگىزگى ماقساتى – بولاشاق جاستاردى كەيىپكەرلەردىڭ تاعدىرىن قايتالاماۋعا, اتا-بابا داستۇرىمەن جۇرۋگە ۇگىتتەۋ. وكىنىشكە قاراي, ەلىمىزدەگى نانىم-سەنىم ەركىندىگىن پايدالانىپ نەبىر قاۋىپتى اعىمدار كەلىپ كىرىپ ورنىعىپ الدى. سونىڭ سالدارىن ەندى سەزىپ وتىرمىز. جاستار اداسىپ, سوعىس اڭساپ شەت ەل اسىپ, اداسىپ جاتىر. بۇل – تەك ءبىز عانا ەمەس, جالپى جاھاندىق ماسەلەگە اينالىپ وتىرعان دۇنيە. ونىمەن جالپى ادامزات بولىپ كۇرەسۋ كەرەك. «ەسىگىمدى قاققان كىم؟» دەگەندى ءۇيدىڭ ەسىگى دەپ تۇسىنبەۋ كەرەك. ولار ءۇيدىڭ ەسىگى ەمەس, سانا مەن تۇيسىك ەسىگى. ونى كىم قاعىپ جاتىر, قانداي ماقساتپەن قاعىپ جاتىر. ايتقىم كەلگەنى وسى» دەيدى دراما اۆتورى جابال ەرعاليەۆ.
«ەسىگىمدى قاققان كىم؟» دراماسىندا باستى رولدەردى كۇليا قوجاحمەتوۆا, جانقالدىبەك تولەنباەۆ, التىناي نوگەربەك سىندى اكتەرلەر سومدايدى. قويۋشى رەجيسسەرى – ەلىمىزدىڭ ەڭبەك سىڭىرگەن قايراتكەرى, رەجيسسەر نۇرلان جۇمانيازوۆ.
بۇركىت نۇراسىل
