استانادا «ۇلى دالا قىراندارى» قوعامدىق مادەني-الەۋمەتتىك قوزعالىسىنىڭ بەس جىلدىعى اتالىپ ءوتىلدى.
اتىنىڭ ءوزى ۇلتتىق رۋح شاقىرىپ تۇراتىن قوزعالىستىڭ باستاپقى ماقساتى دا ەلدى بىرلىككە, ىنتىماققا شاقىرۋدى كوزدەگەن. سالتاناتتى شارادا قوزعالىستىڭ تەڭ توراعالارى, بەلگىلى قوعام قايراتكەرلەرى مارات نابيەۆ پەن سادىبەك تۇگەل جينالعان قاۋىمعا ىزگى تىلەكتەرىن ءبىلدىرىپ, قوعامدىق بىرلەستىكتىڭ بەس جىل بويى اتقارىلعان جۇمىستارى تۋرالى كەڭىرەك ءسوز قوزعادى. ەلىمىزدىڭ ءار ايماعىندا «بىرلىگى مىقتى ەل وزادى» اتتى تاقىرىپپەن جيىندار ۇيىمداستىرىلدى. ءتۇرلى ماڭىزدى مادەني شارالار وتكىزىلدى. سايىن دالانى تۇياعىمەن دۇبىرلەتىپ, شاشاسىنا شاڭ تيمەس جۇيرىك قۇلاگەر مەن داڭقتى بالۋان شولاق بابامىزعا تۇعىرى بيىك ەسكەرتكىش قويىلدى. شىعىس قازاقستان وبلىسىنداعى «بوتاي» جانە «بەرەل» قورىمدارىنان تابىلعان قۇندى جادىگەرلەر جايىندا دوڭگەلەك ۇستەل ءماجىلىسى ءوتتى. وعان بەلگىلى تاريحشىلار ۆيكتور زايبەرت پەن زەينوللا ساماشەۆ قاتىسىپ, اتالعان اسىل مۇرالار جايىندا پاراساتتى وي ءوربىتتى. 2012 جىلدان بەرى قوعامدىق ۇيىم «بۇلاق كورسەڭ, كوزىن اش» دەپ اتالاتىن ماڭىزدى جوبانى قولعا الىپ, شەتەلدە تۇراتىن قازاق بالالارىن تۋعان وتانىنا اكەلىپ, ءبىلىم الۋعا قامقورلىق جاساپ كەلەدى. ۇلتتىق سپورتتىق ونەردىڭ دە باعىن جاندىرىپ, قازاق كوكپارىن الەمدىك دەڭگەيگە كوتەرۋگە بەلسەندى ۇلەس قوسىپ ءجۇر.
شارا بارىسىندا مارات نابيەۆ پەن سادىبەك تۇگەل قوعامدىق بىرلەستىك جۇمىسىنىڭ جاندانۋىنا قوماقتى ۇلەس قوسىپ جۇرگەن ءبىر توپ ازاماتقا العىس حات تاپسىردى.
ازامات ەسەنجول
