«استانا – تازا قالا!» اتتى جالپىقالالىق سەنبىلىككە ەسىل اۋدانى تۇرعىندارى بەلسەنە قاتىستى. ءتورت ءجۇزدەن استام مەكەمە مەن ۇيىم قىزمەتكەرلەرى, ستۋدەنتتەر مەن ءتۇرلى كومپانيا وكىلدەرى – بارلىعى جيىرما مىڭعا جۋىق ادام كوشەت وتىرعىزىپ, ايماقتاردى سىپىرىپ, قوقىستاردى تازالادى.
الدىن الا بەلگىلەنگەن سەگىز ايماقتا 120 تەحنيكا, سونىڭ ىشىندە 90 جۇك اۆتوكولىگى, وتىز شاقتى جۇك تيەگىش كولىك تە جالپى ورتاق ىسكە جۇمىلدىرىلدى. ەڭبەكشىلەر كوشەسىنەن باستاپ نۇرا وزەنى اۋماعىنا دەيىنگى ارالىققا 661 ءتۇپ وتىرعىزۋ جوسپارلانعان ەكەن. بۇل جۇمىستاردى پرەزيدەنت اكىمشىلىگى, پرەمەر-مينيستر كەڭسەسى قىزمەتكەرلەرى, قر جوعارعى سوتى سۋديالارى, قر پارلامەنتىنىڭ دەپۋتاتتارى جانە «نۇر وتان» پارتياسى ورتالىق اپپاراتىنىڭ وكىلدەرى اتقاردى.
ال «حان شاتىر» سوو اۋماعىندا 330 ءتۇپ جاس تال ەگىلدى. ونى ەسەپ كوميتەتىنىڭ, قر كونستيتۋتسيالىق كەڭەسى, ەسىل اۋدانى بويىنشا مەملەكەتتىك كىرىس باسقارماسىنىڭ قىزمەتكەرلەرىمەن بىرگە اكتەرلەر, سازگەرلەر مەن تەلەجۇرگىزۋشىلەر قولعا الدى. سونداي-اق, سەنبىلىك اياسىندا ەسىل اۋدانى اۋماعىنداعى بالاباقشالارعا بىرنەشە اعاش ءتۇرى تەگىن تاراتىلدى. شامامەن ەكى مىڭعا جۋىق تال-تەرەك ءتۇرى بۇيىرتسا, بالالاردىڭ بال مەكەنىن جاسىل جەلەككە ورايتىن بولادى. ەسىل اۋدانىندا قازىرگى ۋاقىتتا 25 بالاباقشا بار ەكەن.
– بۇدان بۇرىن, دالىرەك ايتقاندا, 12 قىركۇيەك كۇنى جالپى ەكولوگيالىق ايلىق باستالعان بولاتىن. وسى ايلىق اياسىندا 17-18 قىركۇيەك كۇنى ەسىل اۋدانى اۋماعىندا كەڭەيتىلگەن كوممۋنالدىق سەنبىلىك وتكىزىلگەن ەدى. وعان جۇزدەن استام مەكەمە قاتىستى. ونىڭ ىشىندە پيك-تەر, ەسىل اۋدانى اكىمدىگىنىڭ مەردىگەرلىك ۇيىمدارى, قۇرىلىس كومپانيالارى, كوممۋنالدىق شارۋاشىلىق باسقارماسىنىڭ مەردىگەرلەرى, ەنەرگەتيكا, قۇرىلىس باسقارماسى, «استانا تەپلوترانزيت» اق, «استانا سۋ ارناسى» مكك-ى قىزمەتكەرلەرى مەن شاعىن جانە ورتا بيزنەس وكىلدەرى قاتىسقان ەدى. ەكى كۇن بويى اتقارىلعان جۇمىستارعا 80 ارنايى تەحنيكا تارتىلدى. سونىڭ ناتيجەسىندە اباتتاندىرۋ ءتارتىبىن بۇزعان كەيبىر جاعدايلار رەتكە كەلتىرىلىپ, ۇلكەن اۋماقتاعى ارامشوپتەر وتالدى. زاڭسىز قوقىس توگىلگەن جەرلەر انىقتالىپ, ولار ارنايى قوقىس توگەتىن ورىندارعا اكەتىلدى. كوممۋنالدىق سەنبىلىك ناتيجەسىندە قوقىس توگەتىن پوليگونعا 531 توننا قوقىس شىعارىلعان بولاتىن. جالپى كوكتەم باستالعالى كۇنى بۇگىنگە دەيىن قۇرىلىس قالدىقتارى مەن تۇرمىستىق قوقىس توگىلگەن 115 ورىن انىقتالىپ, تۇگەل تازالانىپ, قالپىنا كەلتىرىلدى. مۇنداي جەرلەر «گازماشارماتۋرا», «پريگورودنىي», «تەلمان» تۇرعىن ءۇي الابى مەن قورعالجىن تاس جولى, «جاعالاۋ-3» تۇرعىن ءۇي كەشەنى جانە تاعى باسقا جاقتاردان تابىلدى. ول جەرلەردىڭ بارلىعى تالاپقا ساي اباتتاندىرىلدى, – دەيدى ەسىل اۋدانى اكىمدىگىنىڭ ءباسپاسوز حاتشىسى جامال ابىكەنوۆا.
مەڭدوللا نۇرىمۇلى
