جاسىل جەلەككە ورانعان سارىبۇلاق
جالپىقالالىق سەنبىلىكتە قالا اكىمى اسەت يسەكەشەۆ «تازا وزەندەر» شاراسىنا اتسالىسىپ, سارىبۇلاق ارناسىنىڭ بويىندا اعاشتار وتىرعىزدى.
– ەلوردانى كوگالداندىرۋ, بارلىق اۋدانداردا جانە شاعىن اۋدانداردا گۇلباقتار مەن ساياباقتار سانىن ارتتىرۋ – باستى مىندەتتەرىمىزدىڭ ءبىرى. استانادا ءداستۇر بويىنشا جىل سايىن 20 مىڭنان ارتىق كوشەت وتىرعىزىلادى. بيىل بوتانيكالىق باقتىڭ سالىناتىنىن ەسكەرسەك, بۇل كورسەتكىش ەكى ەسەگە ۇلعايادى. وسىنىڭ بارلىعى حالىقتىڭ كۇشىمەن جانە قولداۋىمەن جاسالىپ جاتىر. سەنبىلىكتەر تازالىققا تاربيەلەيدى. وسىلايشا ءبىز قالامىزعا دەگەن ءسۇيىسپەنشىلىگىمىزدى جەتكىزىپ, پاتريوتتىق تانىتامىز, – دەدى استانا قالاسىنىڭ اكىمى اسەت يسەكەشەۆ.
سارىبۇلاق جاعاسى از ۋاقىتتا ادام تانىماستاي وزگەرگەن. اينالدىرعان ەكى ايدىڭ ىشىندە فۋتبول مەن بالالار ويىنىنا ارنالعان الاڭدار سالىندى, سپورتتىق ترەناجەرلەر ورناتىلدى. كوپىردىڭ اينالاسىن كوگالداندىرۋعا دا كوپ كوڭىل بولىنگەن. 400-دەي تۇرعىن بۇل جەردە 926 كوشەت وتىرعىزىپ, سارىبۇلاق ءبىر-اق كۇندە جاسىل جەلەككە ورانىپ شىعا كەلدى. وڭ وزگەرىستەر جايلى استانا قالالىق ءماسليحاتىنىڭ دەپۋتاتى سايات باتپەنوۆ:
– تۇرعىندار «اعاش جوق, بالالار وينايتىن جەر از, سپورتتىق الاڭدار جەتىسپەيدى» دەپ ءجيى شاعىمداناتىن. بارلىق تالاپ-تىلەكتەردى ەسكەرىپ, اۋدان اكىمدىگىنە سارىبۇلاق بويىن اباتتاندىرۋعا قاتىستى جوبا ۇسىندىق. جوبانىڭ ىسكە اسۋ مەرزىمى كۇزگە جوسپارلانعان بولاتىن. ەلوردا اكىمى اسەت ورەنتايۇلى باستامانى بىردەن قولدادى. بەلسەندى جۇمىستاردىڭ ارقاسىندا قوسشىعۇلۇلى كوشەسىنىڭ اۋماعى سەرۋەندەۋگە, ۆەلوسيپەد تەۋىپ, جۇگىرۋگە تاپتىرمايتىن دەمالىس مەكەنىنە اينالدى. مەملەكەتتىك تۇرعىن ءۇي قورىنا جاتاتىن سارى كىرپىشتەن سوعىلعان ۇيلەردىڭ كوپتىگىنەن استانالىقتار بۇل جەردى «سارى اۋدان» اتايتىن ەدى. ەندى بولاشاقتا كورىكتى جاسىل مەكەنگە اينالارى ءسوزسىز, – دەپ اڭگىمەلەپ بەردى.
ال سارىارقا اۋدانىنىڭ اكىمى پاۆەل كۋلاگيننىڭ ايتۋىنشا, كەلەسى جىلى سارىبۇلاقتى اباتتاندىرۋ جۇمىستارىنىڭ ەكىنشى كەزەڭىن جۇزەگە اسىرۋ كوزدەلىپ وتىر. «ەكىنشى كەزەڭى ءا. جانگەلدين كوشەسىنەن ن. تىلەنديەۆ داڭعىلىنا قاراي سوزىلادى. مۇندا ءبىر جارىم مىڭ ءتۇپ اعاش وتىرعىزىلىپ, باسكەتبول, ۆولەيبولعا ارنالعان ۋنيۆەرسالدى الاڭدار قۇرىلىسى جۇرگىزىلەدى. سونىمەن بىرگە, قىسقى ماۋسىم كەزىندە سارىبۇلاق بويىندا سىرعاناق سالۋ دا ويىمىزدا بار» دەيدى اۋدان اكىمى پاۆەل كۋلاگين.
جالپى, كۇزگى ەكولوگيالىق ايلىق اياسىندا سارىارقا اۋدانىنداعى سەنبىلىككە 28 مىڭنان اسا ادام قاتىستى. ولاردىڭ قاتارىندا شاعىن جانە ورتا بيزنەس كاسىپكەرلەرى, 138 پيك, اۋداندىق ارداگەرلەر كەڭەسى, مەكتەپ وقۋشىلارى مەن ۇستازدارى, ستۋدەنت جاستار بار. بۇل كۇنى اۋداندا 2 مىڭعا جۋىق كوشەت ەگىلدى.
ءمادينا جاقىپ