كەيبىر ادامداردىڭ بىلايعى جۇرت تۇسىنە بەرمەيتىن سۇيىكتى ءىسى بولادى. ءبىر قاراعاندا قىستىڭ كۇنى جالاڭ اياق قار كەشىپ نەمەسە مۇز ۇستىندە بالىق اۋلاۋ اقىلعا سىيمايتىن ءىس سياقتى. ءبىز ءۇشىن سارىارقانىڭ سارى ايازىنا قاراماي, ەسىل وزەنىنە بارىپ بالىق اۋلاۋ ەرىككەننىڭ ەرمەگى بولۋى مۇمكىن. دەسەك تە, بالىق اۋلاۋدى ءومىرىنىڭ مانىنە اينالدىرا بىلگەن ازاماتتار ءۇشىن وزەنگە قارماق سالۋ – جان جادىراتاتىن قىزىقتى ءىس.
ەسىل وزەنى – استانالىقتار ءۇشىن جىل ون ەكى اي دەمالۋعا تاپتىرماس مۇمكىندىك. ايتالىق, كوكتەم مەن جاز مەزگىلىندە وزەندى جاعالاپ سەرۋەندەيتىن حالىقتىڭ قاراسى قالىڭ بولادى. ال كۇز بەن قىس ءتۇسىپ, ەسىلگە مۇز قاتا باستاعاننان سىرعاناق تەبۋشىلەر ايدىنعا شىعادى. سونداي-اق, بالىق اۋلاۋدى ءومىرىنىڭ مانىنە اينالدىرعان ازاماتتار قىسى-جازى وزەن جاعالاپ, قارماق سالعاندى جاقسى كورەدى.
ءيا, ەلوردانىڭ جايما شۋاق كۇندەرىندە ەسىلدەن بالىق ۇستاۋ, راسىندا, عاجاپ. الايدا قىستىڭ قىتىمىر كۇندەرىندە قالىڭ مۇزدى ويىپ, قارماق سالاتىن جانداردى تۇسىنە بەرمەۋىمىز مۇمكىن. دەسەك تە, ارامىزدا بالىق اۋلاۋدى ءومىرىنىڭ مانىنە اينالدىرا بىلگەن ازاماتتار بارشىلىق. سولاردىڭ ءبىرى – 7 جاسىنان باستاپ ەسىلدە بالىق اۋلايتىن مۇرات ءالىموۆ. ونىڭ ايتۋىنشا, بالىق اۋلاۋ – بوس ۋاقىت وتكىزۋ ەمەس, دەمالىپ, وي قورىتاتىن مۇمكىندىك.
– وسىندا بالىق اۋلاۋ مەن ءۇشىن قىزىق. بۇل جەردە دەمالىپ, ويلانۋعا مۇمكىندىك الاسىڭ. ۇيدە كومپيۋتەردىڭ الدىندا نەمەسە تەلەفونعا شۇقشيىپ وتىرعانشا, بالىق اۋلاعان كوپ جاقسى. ەسىل وزەنىنە 7 جاسىمنان باستاپ اپتاسىنا 2-3 رەت كەلىپ تۇرۋدى داستۇرگە اينالدىرعانمىن. نەگىزى, وزەنگە قارماق سالۋدى اكەم ۇيرەتتى. اكەم – كانىگى اڭشى ءارى بالىق اۋلاعاندى جاقسى كورەتىن ازامات. ەسىلدەن اۋلاعان شاباقتارىمىزدى ۇلكەن بالىققا جەمتىك رەتىندە پايدالانامىز. ويتكەنى ءار اپتانىڭ سەنبى, جەكسەنبىسى كۇنى اكەم جانە باسقا دا تانىستارىمىزبەن ءبىرگە قورعالجىن كولىنە بارىپ, بالىق اۋلايمىز. مىنە, بۇگىن الداعى دەمالىس كۇندەرى ۇلكەن بالىق اۋلاۋ ءۇشىن وسىندا كەلىپ وتىرمىن, – دەيدى مۇرات ءالىموۆ.
بالىقشى قانشا سۋىق بولسا دا توڭبايتىنىن, ويتكەنى سارىارقانىڭ سارى ايازىنا ابدەن ۇيرەنىپ العانىن ايتادى. نەگىزى, ەسىل وزەنىنە كەلىپ, مۇرات ءالىموۆ سىندى بالىق اۋلايتىن ازاماتتار جەتەرلىك. سولاردىڭ ءبىرى – اقىن ءارى بالىق اۋلاعاندى ۇناتاتىن ەركەعالي بەيسەنوۆ. ونىڭ ايتۋىنشا, بالىق اۋلاۋ قالانىڭ شۋىنان دەمالۋعا ءبىر ءسات مۇمكىندىك بەرەدى.
– تورعاي شورتاندارىنىڭ ۇزىندىعى 1 مەتردەن اسسا, سالماعى 20 كەلىگە دەيىن بارادى. وكىنىشكە قاراي, تورعايعا بارىپ, بالىق اۋلاماعانىما ون شاقتى جىل بولىپ قالدى. قازىر تەك جاز ايلارىندا عانا قارماعىمدى سايلاپ, ەسىل مەن نۇرا وزەندەرىنەن بالىق اۋلاپ تۇرامىن. مۇندا تورعاي ايدىندارىنان كەزدەسپەيتىن تۇقى, موڭكە, كوكسەركە سىندى بالىقتار كوپ. ەسىلدىڭ قالا ىشىندەگى ءبولىكتەرىنەن باستاپ, سابىندى, قوياندى, ۆياچەسلاۆكا, ماكسيموۆكا, تالاپكەر, نوۆويشيمكا, «راحات» بوگەتى سىندى ايماقتاردا «وزەن جاعالاعاننىڭ وزەگى تالمايدى», – دەيدى ەركەعالي بەيسەنوۆ.
ەسىل وزەنىنە قارماق سالاتىن ازاماتتار كانىگى بالىقشىلار ءتارىزدى بالىق اۋلاۋدى كۇنكورىس كوزىنە اينالدىرعان ەمەس. ءويتكەنى ولار ءۇشىن بالىق اۋلاۋ – قىزىقتى ءىس, سالاۋاتتى دەمالىس.
سەرىك قۇدايبەرگەنۇلى
