وقۋشىلار سارايىندا «مەنىڭ «EXPO-2017» كورمەسىنە قوسار ۇلەسىم. قازاقستان ەكونوميكاسىن ءوزىمنىڭ بولاشاق كاسىبىم ارقىلى «جاسىلداندىرۋدىڭ» جولدارى» اتتى ەسسە بايقاۋىندا جەڭىمپاز اتانعان قالاداعى مەكتەپ, كوللەدجدەردىڭ ون بەس تۇلەگىن ماراپاتتاۋ ءراسىمى ءوتتى.
بۇل بايقاۋ «استانا ەكسپو-2017» ۇلتتىق كومپانياسى «MyChina» ءبىلىم بەرۋ ورتالىعىمەن ىنتىماقتاسا وتىرىپ, قر ءبىلىم جانە عىلىم مينيسترلىگىنىڭ قولداۋ كورسەتۋىمەن ۇيىمداستىرىلعان ەدى. اتالعان بايقاۋ 1 ءساۋىر مەن 1 مامىر ارالىعىندا وتكىزىلدى.
ۇيىمداستىرۋشىلار ءبىر اي ىشىندە 2000-عا جۋىق مەكتەپتى ارالاپ, وسى ۋاقىت ارالىعىندا 654 ءوتىنىش قابىلداعان. ونىڭ ىشىندە بايقاۋ تالاپتارىنا جاۋاپ بەرەتىن 445 جۇمىس تاڭدالىنىپ الىنىپ, قازىلار القاسىنا ۇسىنىلعان.
وقۋشىلار ەسسەنى «EXPO» كورمەسىن وتكىزۋدىڭ مەنىڭ ەلىم ءۇشىن ماڭىزدىلىعى», «قازىرگى زامانعى الەم ءۇشىن «جاسىل تەحنولوگيالاردىڭ» ماڭىزدىلىعى» جانە «مەنىڭ كاسىبىم جانە قازاقستاننىڭ يندۋستريالىق-يننوۆاتسيالىق دامۋىنا مەنىڭ قوسار ۇلەسىم» تاقىرىبىندا جازدى.
بايقاۋ كوميسسياسى ەكى اپتا بويى جۇمىستاردى قاراپ, قاتىسۋشىلاردىڭ ەسسە تاقىرىبىن قانشالىقتى تەرەڭ ءارى ناقتى اشىپ كورسەتە العانىنا باعا بەردى. جەڭىمپازدار قاتارىندا مەكتەپتەگى ءتۇرلى پاندەر بويىنشا حالىقارالىق جانە رەسپۋبليكالىق وليمپيادالاردىڭ جۇلدەگەرلەرى, شىعارماشىلىق بايقاۋلاردىڭ لاۋرەاتتارى, عىلىم جوبالاردىڭ اۆتورلارى بولدى. ىرىكتەۋ كەزىندە ولارعا ايتارلىقتاي ءمان بەرىلدى.
ناتيجەسىندە, ەسسەنى ءساتتى جازعان ون وقۋشىعا قىتايدىڭ تاۋ-كەن ءىسى جانە تەحنولوگيالار ۋنيۆەرسيتەتىندە وقۋعا گرانت بەرىلدى. ال, بەس وقۋشى ميلانداعى «ەكسپو» كورمەسىنە بارۋعا جولداما الدى. سونداي-اق, «ترانستەلەكوم» كومپانياسى دا قاتىسۋشىلارعا ەستەلىك سىيلىقتار تاپسىردى.
جاقسى ساتۇلى
