ەكسپو-2017: كورمەدە نەنى قىزىقتايمىز؟
«ەكسپو-2017» حالىقارالىق مامانداندىرىلعان كورمەسى – بالامالى ەنەرگيا كوزدەرى سالاسىندا ادامزاتتىڭ ۇزدىك جەتىستىكتەرىن تالقىلاۋ ءۇشىن تاپتىرماس مۇمكىندىك. دەگەنمەن 93 كۇنگە جالعاساتىن كورمە مادەني-تانىمدىق, سپورتتىق شارالاردان كەندە ەمەس. ءبىز استانادان الىستاماي-اق, تەرراكوت اسكەرىن تاماشالاۋعا, ەجەلگى مىسىر ەسكەرتكىشتەرىنە ساياحات جاساۋعا جانە ەرميتاجداعى ەكسپوناتتاردى كورۋگە شاقىرامىز.
تۋريستەر ءۇشىن تارتىمدى تەرراكوت
وتەتىن ورنى: قر ۇلتتىق مۋزەيى
كۇنى: 9 ماۋسىم – 10 قىركۇيەك
ۋاقىتى: 15:00
قر ۇلتتىق مۋزەيىندە 9 ماۋسىمنان 10 قىركۇيەككە دەيىن اتى اڭىزعا اينالعان يمپەراتور تسين ءشيحۋانديدىڭ تەرراكوت اسكەرى مۋزەيىنىڭ كورمەسى وتەدى. كەلۋشىلەر يۋنەسكو-نىڭ مادەني مۇرالار ءتىزىمىنە ەنگىزىلگەن الەمدىك ونەر جاۋھارى – تسين ديناستياسىنىڭ تەرراكوت مۇسىندەرىمەن تانىسادى. جاۋىنگەرلەردىڭ مۇسىندەرى ناعىز ونەر تۋىندىسى دەسەك ارتىق ەمەس, ءار ءمۇسىننىڭ كەسكىنى مەن بەت-الپەتى قايتالانبايدى. كورمەگە ەلۋگە جۋىق ارحەولوگيالىق بۇيىمدار قويىلادى. اتاپ ايتساق, اسكەرلەردىڭ مۇسىندەرى, قارۋ-جاراقتار, ىدىس-اياقتار, التىن جانە كۇمىس اشەكەيلەر كورەرمەننىڭ كوزايىمىنا اينالادى.
تاريحقا ۇڭىلسەك, تسين شيحۋاندي تاقتا ءبىر جىل وتىرعاننان كەيىن ب.ز.د. 246 جىلى ءوزىنىڭ مازارىن سالا باستادى. پاتشا 8099 قىتاي جاۋىنگەرى مەن ولاردىڭ اتتارى و دۇنيەگە سەرىك بولادى دەپ سەنىپ, ولاردىڭ ءمۇسىنىن ساز بالشىقتان كۇيدىرتىپ جاسايدى. تۋريستەر ءۇشىن سيان قالاسىنداعى ساياحاتتىڭ قۇنى شامامەن 250 ءيۋاندى (37 دوللاردى) قۇرايدى. ال استانالىقتار مەن قالا قوناقتارى ساۋلەت ونەرىنىڭ عاجايىپ تۋىندىسىن نەبارى 200-1000 تەڭگەگە تاماشالاي الادى.
ەجەلگى مىسىر ەسكەرتكىشتەرى
وتەتىن ورنى: قر ۇلتتىق مۋزەيى
كۇنى: 23 ماۋسىم – 3 تامىز
ۋاقىتى: 15:00
ءبىر مەزەت پەرعاۋىن زامانىنا ساپار شەككىڭىز كەلە مە؟ كورمە قوناقتارى ەلورداداعى ۇلتتىق مۋزەيدە ەجەلگى مىسىردىڭ مادەنيەتى مەن تاريحىمەن ەتەنە تانىسۋعا مۇمكىندىك الادى.
مىسىر پەرعاۋىنى تۋتانحاموننىڭ مولاسىندا تابىلعان جەكە زاتتارى وركەنيەتتىڭ ورتاق مۇراسىنا اينالعانىنا قاشان. قۇندى جادىگەرلەر قاتارىنا پاتشانىڭ التىن جالاتىلعان اعاش كۇيمەسى, وتىرعان تاعى, ساركوفاگى, اسىل تاستارمەن ورنەكتەلگەن پەرعاۋىننىڭ التىن جاعاسى جانە قىز ءمۇسىنى جاتادى. ەجەلگى مىسىرداعى يەروگليف جازۋىنىڭ پايدا بولۋىن نارمەر پەرعاۋىنمەن بايلانىستىرادى. گرەك-ريم كەزەڭى ريمدىك ايەل بەينەسىنىڭ ءمۇسىنى ارقىلى كورسەتىلەدى. اسەم جازۋلارمەن بەزەندىرىلگەن شىراعدان جانە گۇلمەن كومكەرىلگەن فارفور تاباق جادىگەرلەرى يسلام كەزەڭىن قامتيدى. وسىنىڭ ءبارى 23 ماۋسىمنان باستاپ ەلوردالىقتار مەن قوناقتاردىڭ نازارىنا ۇسىنىلادى.
وح, ەرميتاج, ەرميتاج!
وتەتىن ورنى: قر ۇلتتىق مۋزەيى
كۇنى: 3 شىلدە – 10 قىركۇيەك
ۋاقىتى: 15:00
مادەني شارالار اياسىندا 3 ميلليونعا جۋىق جادىگەرى بار الەمدەگى ەڭ ۇلكەن مۇراجاي ەرميتاجدان اكەلىنەتىن قارۋ-جاراق كورمەسىن وتكىزۋ جوسپارلانعان. 3 شىلدەدەن 10 قىركۇيەككە دەيىنگى ارالىقتا كەلۋشىلەر مۇراجايدا سان جىلدار بويى ساقتالعان بىرەگەي قارۋ ۇلگىلەرىن تاماشالايدى. قر ۇلتتىق مۋزەيىندە بولاتىن «ەرميتاج كۇندەرىندە» شىعىس پەن باتىستىڭ 70-كە جۋىق قارۋ-جاراق ونەرىنىڭ ۇلگىسى ۇسىنىلادى. ونىڭ ىشىندە تۇركيا, يران, ءۇندىستان, جاپونيا, فرانتسيا, يتاليا, گەرمانيا, يسپانيا ەلدەرىندە اسكەردە, اڭشىلىقتا, مەرەكەدە پايدالانعان قارۋلاردى كەزدەستىرۋگە بولادى. كورمەنىڭ حرونولوگيالىق شەڭبەرى XV-XIX عاسىر ارالىعىن قامتيدى. مۇراجايعا قويىلاتىن زاتتار وتكەن عاسىرداعى ۇستالاردىڭ شەبەرلىگىنەن سىر شەرتەدى. كەلەم دەۋشىلەرگە بيلەتتىڭ باعاسى – 950 تەڭگە.
گۇلدانا تالعاتقىزى