ەكسپو كورمەسى كەزىندە وتەتىن مادەني شارالاردىڭ ءتىزىمىن ۇلتتىق كومپانيانىڭ كونتەنت جانە شارالاردى ۇيىمداستىرۋ دەپارتامەنتى ۇسىندى.
ەلىمىزدىڭ ونەرپازدارى مەن شەتەلدىك تانىمال ءارتىستەردىڭ قاتىسۋىمەن بولاتىن مادەني شارالار بيلەتى 1 ماۋسىمنان باستاپ جاپپاي ساتىلىمعا تۇسەدى. كورمەنى قىزىقتاۋعا كەلگەندەر 3 مىڭعا جۋىق شاراعا قاتىسادى. وعان قوسا, حالىقارالىق قاتىسۋشىلار 300-دەي مادەني شارا وتكىزبەك. كونتەنت جانە شارالاردى ۇيىمداستىرۋ دەپارتامەنتىنىڭ ديرەكتورى مارات وماروۆتىڭ ايتۋىنشا, وسىلايشا مادەني-ويىن-ساۋىق باعدارلامانىڭ 80 پايىزىن ەلىمىزدىڭ مادەنيەت مايتالماندارى وتكىزەدى.
– ماقساتىمىز – قوناقتاردىڭ كورمەگە قىزىعۋشىلىعىن وياتىپ, ەلورداعا تۋريستەردى تارتۋ. ءبىز ۇسىنعان باعدارلاما شەتەلدىكتەردى قازاق ەلىنىڭ تاريحى مەن مادەنيەتىمەن تانىستىرىپ, قازاقتىڭ ءانشى-كۇيشىلىك داستۇرىنەن حابار بەرەدى. ول ءۇشىن ءبىزدىڭ وركەسترلەر, شىعارماشىلىق ۇجىمدار, انشىلەر مەن بيشىلەر بارىن سالماق. ال اتى اڭىزعا اينالعان شەتەلدىڭ تانىمال ارتىستەرى ەكسپو-عا قىزىعۋشىلىقتى ودان ارمەن قىزدىرا تۇسەدى, – دەدى م.وماروۆ.
ەكسپو قالاشىعىندا شارالاردى ءوز دەڭگەيىندە وتكىزۋ ءۇشىن ارنايى ءۇش ورىن بەلگىلەنگەن. امفيتەاتر 1000-عا جۋىق ادام, «ەنەرگيا حولى» 1000-عا تارتا كورەرمەندى جانە كونگرەسس-ورتالىق 2100-دەي ادامدى قابىلداۋعا قاۋقارلى. ال ارت-ورتالىقتا كوبىنەسە سۋرەتشىلەردىڭ كورمەسى مەن وزگە مادەني شارالاردى وتكىزۋ جوسپارلانعان.
ادەتتە, ەل تاريحى ءۇشىن ماڭىزدى شارانىڭ سالتاناتتى اشىلۋ راسىمىنە كوپ كۇش جۇمسالىپ, ايتارلىقتاي قارجى كەتەدى. «ءبىز «ەكسپو-2017» حالىقارالىق مامانداندىرىلعان كورمەنى 10 ماۋسىم كۇنى «ۇلى دالا سيمفونياسى» اتتى شوۋمەن اشامىز. بەس كۇن قاتارىنان سول باعدارلامانى قايتالاپ وتىرامىز. مەرەكەلىك باعدارلامالاردى نەعۇرلىم كوپ ادام كورسە دەگەن نيەت بار. قازاق حالقىنىڭ تاريحىنان سىر شەرتەتىن شوۋعا 600-گە جۋىق ءارتىس قاتىسادى. مۋزىكانى ءبىراز وڭدەيمىز, دەگەنمەن ارتىستەر قازاق كومپوزيتورلارىنىڭ كلاسسيكالىق شىعارمالارىن ورىندايدى» دەپ باعدارلامامەن تانىستىردى دەپارتامەنت باسشىسى.
جۇرتشىلىق اراسىندا بيلەت قۇنى ءبىراز اڭگىمە بولىپ, تۇسىنبەستىك تۋعىزعان ەدى. ءباسپاسوز ماجىلىسىندە ماسەلەنىڭ باسىن اشىپ الۋعا مۇمكىندىك بولدى. ەكسپو ۇسىنعان مادەني شارالاردىڭ كەيبىرەۋىنە كورمەگە بيلەت ساتىپ الساڭىز بولعانى, ال قالعانىنا ارنايى بيلەت ساتىپ الۋ كەرەك. «استانا اقشامى» گازەتى وقىرمان نازارىنا تەگىن جانە اقىلى شارالار ءتىزىمىن ۇسىنادى.
گۇلدانا تالعاتقىزى
