بيىلعى تامىزدا ورتامىزدان مىقتى تەراپەۆت دارىگەر, مەديتسينا عىلىمدارىنىڭ دوكتورى, پەداگوگ, پروفەسسور تالعات ءماجيتوۆتى سۇم اجال الىپ كەتتى. ۇزاققا سوزىلعان دەرتتەن ول 58 جاسىندا دۇنيەدەن وزدى. تالعات مانسۇرۇلى تەراپيا جانە كلينيكالىق فارماكولوگيا سالاسىندا جوعارى ساناتتى كاسىبي مامان بولاتىن.
ارىپتەستەرى ونىڭ, اسىرەسە, فارماكوتەراپيا سالاسىن دامىتۋعا قوسقان ەرەن ەڭبەگىن ەرەكشە اتاپ وتەدى. پروفەسسوردىڭ باسشىلىعىمەن وسى باعىتتا وقىتۋ باعدارلاماسى جاسالىپ, سول ارقىلى قازىرگى تاڭدا ەلىمىزدىڭ مەديتسينالىق ۇيىمدارىندا ەڭبەك ەتىپ جۇرگەن كلينيكالىق فارماكولوگيا ماماندارىنىڭ مىقتى بۋىنى دايىنداپ شىعارىلدى. عالىم وسى سالاداعى عىلىمنىڭ دامۋىنا دا ءوز ۇلەسىن قوسىپ, اتالعان باعىتتا مەديتسينا عىلىمدارىنىڭ كانديداتتارى مەن دوكتورلارىن تاربيەلەپ بەردى. سوندىقتان ونى بارشا تۇلەكتەرى «ەلىمىزدىڭ مىڭداعان دارىگەرلەرىنىڭ ۇستازى» دەپ اتايدى.
تالعات ءماجيتوۆ 1962 جىلى بۇرىنعى گۋرەۆ, قازىرگى اتىراۋ وبلىسىندا دۇنيەگە كەلگەن. ورتا مەكتەپتى تامامداعان سوڭ الماتى مەملەكەتتىك مەديتسينا ينستيتۋتىنا وقۋعا تۇسەدى. ونى 1985 جىلى ۇزدىك باعاعا اياقتاپ, روستوۆ حالىقتار دوستىعى وردەنى مەديتسينالىق ينستيتۋتى جانىنداعى كلينيكالىق ورديناتۋراعا «تەراپيا» ماماندىعى بويىنشا وقۋعا تاپسىرادى. ۇشقىر ويى مەن عىلىمعا قۇشتارلىعىنىڭ ارقاسىندا ول پروفەسسور ن.فەدوروۆتىڭ جەتەكشىلىگىمەن عىلىمي-زەرتتەۋ جۇمىسىنا ارالاسادى. ءسويتىپ 1992 جىلى ول «سوزىلمالى كالكۋلەزدى ەمەس حولەتسيستيتتىڭ كەشەندى تەراپياسىندا تانافلون مەن حولونەرتوننىڭ كلينيكالىق تيىمدىلىگىن سالىستىرا باعالاۋ» دەپ اتالاتىن كانديداتتىق ديسسەرتاتسياسىن وتە جوعارى دەڭگەيدە ورىنداپ, قورعاپ شىعادى. سول جىلى الماتىعا ورالىپ, ءوزى ءبىلىم العان ينستيتۋتتىڭ كلينيكالىق فارماكولوگيا كافەدراسىندا الدىمەن وقىتۋشى, ارتىنان دوتسەنت بولىپ قىزمەت اتقارادى. 2002 جىلى قاراعاندى مەملەكەتتىك مەديتسينا اكادەمياسىنىڭ كلينيكالىق فارماكولوگيا كافەدراسىن باسقارادى.
تالعات مانسۇرۇلىنىڭ ەلورداداعى قىزمەتتىك جولى 2007 جىلى استانا مەديتسينالىق ۋنيۆەرسيتەتىنە شاقىرتىلىپ, جالپى جانە كلينيكالىق فارماكولوگيا كافەدراسىن باسقارۋمەن باستالدى. ال 2015-2017 جىلدارى وسىندا كلينيكالىق فارماكولوگيا ينتەرناتۋراسى كافەدراسىنىڭ پروفەسسورى بولىپ ەڭبەك ەتەدى. 2014 جىلى «بولاشاق» باعدارلاماسىمەن دەنساۋلىق ساقتاۋ سالاسىنداعى مەنەدجمەنت بويىنشا اقش-تا ءبىر جىلدىق تاعىلىمدامادان وتەدى. سالاعا سىڭىرگەن ەڭبەگى باعالانىپ, «دەنساۋلىق ساقتاۋ سالاسىنا قوسقان ۇلەسى ءۇشىن» توسبەلگىسىمەن ماراپاتتالعان.
دارىگەر ومىرلىك جارىن دا ءوزى سۇيگەن سالادان تاپقان. زايىبى – راۋشان قاراباەۆا دا قر ءپىب مو اۋرۋحانا ديرەكتورىنىڭ ەمدەۋ-دياگنوستيكالىق جۇمىس جونىندەگى ورىنباسارى قىزمەتىن اتقارادى. ءوز ءىسىنىڭ بىلگىرى, ادال دا اقجارقىن ازامات, شىنايى ينتەلليگەنت, ادامي قاسيەتتەرى مول جان رەتىندە كوپتىڭ كوڭىلىندە قالعان تالعات ءماجيتوۆتى بىلەتىندەر قيماستىقپەن ەسكە الادى. ونىڭ دۇنيەدەن ءوتۋى قازاقستاننىڭ دەنساۋلىق ساقتاۋ سالاسىنا دا, عىلىمىنا دا ورنى تولماس قايعى بولدى. اسىرەسە, ءومىرىنىڭ سوڭىندا كافەدرا مەڭگەرۋشىسى بولىپ ەڭبەك ەتكەن – استانا مەديتسينالىق ۋنيۆەرسيتەتى ۇجىمى ءۇشىن اياۋلى ارىپتەستىڭ ورنى ويسىراپ قالدى. جاقسى ادامنىڭ جارقىن بەينەسى ونى جاقىن بىلگەندەردىڭ جۇرەگىندە ماڭگىلىككە ساقتالادى.
