فينليانديا پرەزيدەنتى ساۋلي نينيستيو «ەكسپو-2017» حالىقارالىق مامانداندىرىلعان كورمەنىڭ قۇرمەتتى قوناعى بولماق.
قر سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ ايتۋىنشا, فينليانديا پرەزيدەنتىنىڭ قازاقستانعا ساپارى 19-21 ماۋسىمعا جوسپارلانىپ وتىر. ساپار بارىسىندا ساۋلي نينيستيو كوپتەگەن شارالارعا قاتىسۋدى ماقسات تۇتۋدا. اتاپ ايتساق, 19 ماۋسىمنان باستاپ استانا-حەلسينكي باعىتى بويىنشا ەكى ەل اراسىنداعى تىكەلەي اۋە رەيسى اشىلادى. ال 18-19 ماۋسىم ارالىعىندا ەلوردادا وۋلۋ قالاسىنىڭ مادەني كۇندەرى ۇيىمداستىرىلادى. سونداي-اق, مەملەكەت باسشىسى كورمە اۋماعىندا وتەتىن فينليانديانىڭ ۇلتتىق كۇنى مەرەكەسىنە قاتىسادى.
استانا مەن حەلسينكي اراسىنداعى قاتىناس 2013 جىلعى فينليانديا پرەزيدەنتى ساۋلي ءنينيستيونىڭ قازاقستانعا مەملەكەتتىك ساپارى بارىسىندا قابىلدانعان «جاسىل ەكونوميكانى» دامىتۋداعى ارىپتەستىك تۋرالى دەكلاراتسيادا بەكىتىلگەن. فينليانديا «جاسىل» باستامالاردى جۇزەگە اسىرۋداعى الەمدىك كوشباسشى رەتىندە جاقسى تانىس. قازاقستان كورمە اياسىندا فينليانديانىڭ ۇلتتىق پاۆيلونى اشىلۋىنا قولداۋ ءبىلدىرىپ, ونىڭ ەكى ەل اراسىنداعى ىنتىماقتاستىقتى ودان ءارى دامىتىپ, تىڭ يدەيالار مەن مۇمكىندىكتەرگە سەرپىن بەرەتىنىنە سەنىمدى.
ايتا كەتەيىك, بۇگىن قازاقستان مەن فينليانديا اراسىندا ديپلوماتيالىق قارىم- قاتىناس ورناعانىنا 25 جىل تولدى.
گۇلدانا تالعاتقىزى
