كەشە يسپانيا كورولدىگى ءوزىنىڭ ۇلتتىق كۇنىن ەكسپو قالاشىعىندا اتاپ ءوتتى. سالتاناتتى ءراسىمدى يسپاندىق فلامەنكو بيىمەن Compania Flamenca توبى اشتى. ال رەسمي بولىمدە ادەتتەگىدەي ەكى ەلدىڭ تۋى كوككە كوتەرىلىپ, ءانۇرانى شىرقالدى.
يسپانيا دەلەگاتسياسىنىڭ اتىنان ءسوز سويلەگەن دەپۋتاتتار كونگرەسىنىڭ ءتورايىمى انا پاستور قازاقستان يسپانيانىڭ ورتالىق ازياداعى سەنىمدى سەرىكتەسى ەكەندىگىن باسا ايتتى.
– بىلتىر ەكى ەل اراسىنداعى تاۋار اينالىم 965 ميلليون ەۋروعا جەتتى. يسپانيا كورولدىگىنىڭ «ەكسپو-2017» كورمەسىنە قاتىسۋى قازاقستانمەن ساياسي, ەكونوميكالىق جانە مادەني قارىم-قاتىناستاردى نىعايتۋ, ەنەرگەتيكالىق ماسەلەلەردىڭ شەشىمىن تابۋعا باعىتتالعان قادامى دەپ بىلىڭىزدەر. مەملەكەتتەر اراسىنداعى 25 جىلدىق دوستىق بارىسىندا ءبىز كوپتەگەن جەتىستىكتەرگە قول جەتكىزدىك. بۇل بايلانىس ودان ءارى ارتا ءتۇسىپ, جاڭا باستامالارعا ارقاۋ بولادى دەپ سەنەمىن, – دەدى انا پاستور.
يسپانيا الەمدە كولىك ينفراقۇرىلىمى بويىنشا ۇزدىك وندىققا كىرەدى. ال قۇرىلىس, اۆتوكولىك جولدارى, تەمىر جولدار, اەروپورتتاردى باسقارۋ سالاسىندا ون ەلدىڭ ىشىندە ءتورتىنشى ورىندا. بۇگىندە كولىك جۇيەسىنىڭ كونتسەسسياسى 33 پايىزعا يسپان كاسىپورىندارعا تيەسىلى. ماسەلەن, يسپان كومپانيالارى قاسيەتتى مەككە مەن مەدينا قالالارىن جالعايتىن جوعارى جىلدامدىقتى تەمىر جولىن جانە انكارادان ىستامبۇلعا دەيىنگى قاتىناس جولدارىن سالۋ سىندى وزىق جوبالاردى جۇزەگە اسىرعان. ال ەلىمىزدىڭ كومپانيالارىمەن بىرلەسە سالعان جوعارى جىلدامدىقتى يسپان پويىزدارى استانا مەن الماتى اراسىن جاقىنداتا ءتۇستى.
كورمە اۋماعىندا كۇنى بويى كارروس دە فوك كوشە تەاترى ونەر كورسەتىپ, «دون كيحوت» شىعارماسىن جاپپاي وقۋ ۇيىمداستىرىلدى.كورولدىك مەرەكەلىك شارالار لەگىن ءتورت كۇن بويى جالعاستىرىپ, ۇلتتىق كۇنىن وسىلايشا ۇلىقتاماقشى. 18-21 شىلدە ارالىعىندا يسپان پاۆيلونى الاڭىندا ساعات 19:00-دە فلامەنكو ءبيىن تاماشالاي الاسىزدار. ال تامىز ايىندا قالا كينوتەاترلارىندا يسپان كينوسى كورسەتىلەدى.
گۇلدانا تالعاتقىزى
