فرانتسۋز ينۆەستورلارىنا تانىستىرىلدى
ەكونوميكالىق ديپلوماتيانى ىلگەرىلەتۋ اياسىندا قازاقستاننىڭ فرانتسياداعى ەلشىلىگى فرانتسۋز ينۆەستورلارىنا ەلىمىزدىڭ ايماقتارىن تانىستىرۋ توپتاماسىن وتكىزۋ باستاماسىن كوتەردى.
بەينەكونفەرەنتسيا فورماتىنداعى العاشقى وسىنداي كەزدەسۋ نۇر-سۇلتان قالاسىنىڭ اكىمدىگى مەن MEDEF قاۋىمداستىعىنا مۇشە – فرانتسۋز كومپانيالارى اراسىندا ءوتتى. ونلاين ءىس-شاراعا قازاقستان-فرانتسيا ىسكەرلىك كەڭەسىنىڭ تەڭ توراعالارى ايدان كارىبجانوۆ پەن يۆ-لۋي دارريكاررەر, قازاقستان ەلشىسى جان عاليەۆ, نۇر-سۇلتان قالاسى اكىمىنىڭ ورىنباسارى ماليكا بەكتۇروۆا, سونداي-اق «Astana Invest» جانە «Astana Innovations» كومپانيالارىنىڭ وكىلدەرى قاتىستى. م.بەكتۇروۆا قالالىق ينفراقۇرىلىمنىڭ جاعدايى مەن بولاشاعى, سونداي-اق شەتەلدىك ينۆەستورلارمەن جانە سەرىكتەستەرمەن ءوزارا ارەكەتتەسۋ مەحانيزمدەرى تۋرالى ەگجەي-تەگجەيلى اقپارات بەردى. فرانتسۋز كومپانيالارىنىڭ وكىلدەرى وزدەرىن قىزىقتىرعان بىرقاتار سۇراقتار قويىپ, تولىققاندى جاۋاپتار الا الدى. اتاپ ايتقاندا, ولاردى ينفراقۇرىلىم مەن كولىكتى دامىتۋ, ەكولوگيانى جاقسارتۋ جانە قورشاعان ورتانى قورعاۋ, سونداي-اق تسيفرلاندىرۋ جوبالارىنا قاتىسۋ مۇمكىندىكتەرى قىزىقتىردى. فرانتسۋز ارىپتەستەر ۇسىنىلعان اقپاراتتىڭ جوعارى ساپاسى مەن وزەكتىلىگىن اتاپ ءوتتى. كەزدەسۋگە قاتىسۋشىلار بىرلەسكەن جوبالار بويىنشا جۇزبە-ءجۇز تالقىلاۋ وتكىزۋ ءۇشىن سانيتارلىق كەدەرگىلەردىڭ تەزىرەك الىناتىنىنا ءۇمىت ءبىلدىردى.