ءبىر انىعى, قالاعا گاز تاراتىلاتىن بولدى. تاراتۋ جەلىلەرىنىڭ قۇرىلىسى ءۇش كەزەككە بولىنگەن. ءى كەزەكتىڭ تەحنيكالىق-ەكونوميكالىق نەگىزدەمەسى جاسالىپ, مەملەكەتتىك ساراپتامانىڭ قورىتىندىسى شىعارىلىپ, جوبا 2019-2023 جىلدار ارالىعىندا جۇزەگە اسىرىلادى دەپ بەلگىلەنىپتى. ال گازداندىرۋدىڭ ءىى-ءىىى كەزەكتەر قۇرىلىسى قارجىلاندىرۋعا بايلانىستى 2024-2030 جىلدار ارالىعىندا قولعا الىنادى دەپ بولجانىپ وتىر. دەگەنمەن ءالى دە تۇيتكىلدى ماسەلە از ەمەس. الەۋەتتى كومپانيالاردىڭ ءوزارا دۇردارازدىعى كەسىرىنەن گاز تاراتۋ جۇمىستارى و باستا جوسپارلانعان مەرزىمنەن كەم دەگەندە جارتى جىل كەشەۋىلدەپ قالعان.
الەۋەتتى جابدىقتاۋشىلار اعىمداعى جىلدىڭ 28 قاڭتارىنان بەرى كەشەندى كوميسسيانىڭ قاي-قاي شەشىمدەرى بويىنشا دا ءبىرى-بىرىمەن كەلىسپەي, سەنىمسىزدىك تانىتىپ, ءبىرىنىڭ ۇستىنەن ەكىنشىسى سوتقا شاعىمدانىپ ءجۇر. سونىڭ سالدارىنان گاز تاراتۋ جۇمىسى توقتاپ تۇر.
– جابدىقتاۋشىلاردىڭ ءوزارا داۋ-دامايلارى كەسىرىنەن بەلگىلەنگەن كەستەدەن كەشىگىپ قالدىق. ەندى ءبىر ايدىڭ جۇزىندە گاز تاراتۋ توراپتارىنىڭ قۇرىلىسىن باستايمىز دەگەن ويدامىن.
قۇرىلىستىڭ ءبىرىنشى كەزەگىن 2019-2021 جىلدار ارالىعىندا جۇزەگە اسىرۋ جوسپارلانعان, – دەدى ەلوردانىڭ وتىن-ەنەرگەتيكالىق كەشەنi جəنە كوممۋنالدىق شارۋاشىلىق باسقارماسىنىڭ باسشىسى ەربول تولەۋوۆ.
ءى كەزەكتىڭ ىشىندە توعىز ىسكە قوسۋ كەشەندەرى بار. «قازمۇنايگاز» اق قىزىلوردادان نۇر-سۇلتانعا دەيىن 1200 شاقىرىم قاشىقتىقتان گاز قۇبىرىن تارتادى. ال قالاىشىلىك گاز تاراتۋ توراپتارىن جۇرگىزۋ قالالىق اتقارۋشى بيلىكتىڭ ءوز ەنشىسىنە بەرىلگەن.
– قازىرگى كۇنى ءوزىمىز جاريالاعان مەملەكەتتىك ساتىپ الۋ پروتسەدۋراسى ءوزىمىزدىڭ ۇلكەن ءبىر پروبلەمامىزعا اينالىپ وتىر. ءبىز مەملەكەتتىك ساراپتاۋ ارقىلى جوبالىق-سمەتالىق قۇجاتتى وتتىك, ونى جاريا ەتتىك جانە ءالى كۇنگە دەيىن مەملەكەتتىك ساتىپ الۋ پروتسەدۋراسى ءجۇرىپ جاتىر, – دەدى ەربول تولەۋوۆ.
استاناعا گاز تاراتۋ ىسىندە شەشىمىن تاپپاي جاتقان بۇدان باسقا دا پروبلەمالار بار شىعار, بىراق 2019 جىلدىڭ سوڭىنا دەيىن جوبانىڭ ىسكە قوسىلاتىندىعى قالا تۇرعىندارىنا ءۇمىت سىيلادى. گاز ءبىرىنشى كەزەكتە «كوكتال-1, 2», «جەلەزنودوروجنىي», «وڭتۇستىك-شىعىس» تۇرعىن الاپتارىنا بارادى. قۇرىلىستىڭ ءىى-ءىىى كەزەكتەرىندە «شۇبار», «Family Village», «Garden Village», «ءوندىرىس», «اگروقالاشىق», «پريگورودنىي», «ميچۋرينو», «ينتەرناتسيونالنىي», «كۇيگەنجار», «پرومىشلەننىي», «تەلمان» تۇرعىن الاپتارىن جانە قالانىڭ جاقىن جاتقان اۋداندارىن گازداندىرۋ جوسپارلانعان.
