استاناداعى ۇلتتىق اكادەميالىق كىتاپحانادا قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن «Tilalemi.kz» پورتالى, «Atau.kz» ونوماستيكالىق, «Emle.kz» ورفوگرافيالىق جانە «Termincom.kz» تەرمينولوگيالىق سايتتارىنىڭ تۇساۋى كەسىلدى. يگىلىكتى شاراعا ەلورداداعى يگى جاقسىلاردىڭ ءبارى جينالدى.
ەلىمىز ەگەمەندىك العاننان بەرى انا ءتىلىمىزدى قالاي دامىتامىز, ونىڭ كەرەگەسىن قالاي كەڭەيتەمىز دەگەن ماسەلەلەر ۇنەمى الدىمىزدا تۇر. وسى باعىتتا قىرۋار شارۋا اتقارىلدى دا, سولاردىڭ ىزگى جالعاسى رەتىندە ۋاقىت تالابىنا ساي مەملەكەتتىك ءتىلدى دامىتۋعا ارنالعان جاڭا پورتالدىڭ ءجونى دە, جوباسى دا بولەك. ەندى كەز كەلگەن وقىرمان قازاق تىلىنە قاتىستى كوكەيتەستى ماسەلەلەردى ينتەرنەت-كەڭىستىك ارقىلى ءبىلىپ وتىرادى. ءبىر عاجابى, ونى شەت مەملەكەتتە تۇراتىن اعايىندار دا تۇتىنادى.
– نەگىزگى ماقساتىمىز – 2011-2020 جىلدارعا ارنالعان تىلدەردى دامىتۋدىڭ مەملەكەتتىك باعدارلاماسىن تىڭعىلىقتى ورىنداۋ. سول سەبەپتى تانىمال عالىمدارمەن جانە ءىت ماماندارىمەن كەلىسە وتىرىپ, «ءتىل الەمىن» امبەباپ دەڭگەيدەگى پورتال ەسەبىندە, ال جاڭا اتالعان ۇشەۋىن سايت ەسەبىندە ەنگىزدىك. پورتالدا ءتىل عىلىمىنا قاتىستى 1000-عا جۋىق كىتاپ ورنالاسقان. بۇل پورتال ارقىلى ءبىر مەزەتتە ميلليونداعان وقىرمان وزىنە قاجەتتى ماعلۇماتپەن تانىسادى. سونداي-اق, وقىرماندار ءتىل ماسەلەسى جايىنداعى ماقالالارىن, اشىق پىكىرىن جاريالاي الادى, – دەدى ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى ەربول تىلەشەۆ.
ءتىل تۋرالى جيىندا تۇساۋى كەسىلگەن ءاربىر سايتتىڭ ءوز ەرەكشەلىگى بار. ماسەلەن, «Termincom.kz» سايتىندا تەرمينولوگيالىق لەكسيكانى بىرىزدەندىرۋ, قوردى تولىقتىرۋ, اتاۋلاردى قازاق ءتىلىنىڭ نورمالارىنا سايكەس رەتتەۋ كوزدەلسە, «Atau.kz» سايتىندا ەلىمىزدىڭ بارلىق ءوڭىرلەرىندەگى ەلدى مەكەندەردىڭ اتاۋلارى, كوشەلەرى قامتىلعان. بۇل ونوماستيكا سالاسىنداعى قوردالانعان ماسەلەلەردى شەشۋدىڭ ءبىر تەتىگى بولماق.
شارا بارىسىندا ەلىمىزگە بەلگىلى زيالىلار ءسوز الىپ, ويلارىن جەتكىزدى. اسىرەسە, قر پارلامەنتى ءماجىلىسىنىڭ دەپۋتاتى, قارىمدى قالامگەر ساۋىتبەك ءابدىراحمانوۆتىڭ ايتقان پىكىرى كوڭىلگە قونىمدى. «قازىرگى ءبىزدىڭ تىلىمىزگە ءتونىپ تۇرعان قاۋىپتىڭ ءبىرى – جازۋدان بۇرىن سويلەۋ. ەل تارتىپكە ءتۇسۋ ءۇشىن, ءتىل تارتىپكە ءتۇسۋ كەرەك. بۇكىل الەم ورفوگرافيا بويىنشا جازادى, ورفوەپيا بويىنشا سويلەيدى. ءبىزدىڭ جۋرناليستەر سينگارمونيزم زاڭدىلىعىن ۇمىتىپ, كوگىلدىر ەكران بەتىنەن ءسوزدىڭ جازىلۋىن قاز-قالپىندا وقىپ ءجۇر. الداعى تاڭدا جاڭا پورتال وسىنداي ولقىلىقتاردى تۇزەتۋگە ات سالىسسا دەگەن ۇسىنىس بار» دەدى ول.
ازامات ەسەنجول
