كەشە ەلوردا اكىمى التاي كولگىنوۆ مەملەكەت باسشىسى قاسىم-جومارت توقاەۆتىڭ اتىنان بەلسەندى ەرىكتىلەر مەن ازاماتتارعا «حالىق العىسى» مەدالىن تابىستادى.
«قالالىقتار پاندەميا كەزىندە ۇيىمشىلدىق تانىتتى, جاقىندارىنا كومەكتەسىپ, Covid-19 تارالماۋىنا وزدەرىنىڭ ۇلەسىن قوستى. ەرىكتىلەر باقىلاۋ – وتكىزۋ بەكەتتەرىندە كەزەكشىلىك اتقاردى, دەزينفەكتسيا جاساۋعا قاتىستى, جەدەل شتابتا دا جۇمىس ىستەدى. ازاماتتارىمىزدىڭ تۇرمىسى تومەن ساناتتارىنا ءدارى-دارمەك, ازىق-تۇلىك پەن قورعانۋعا ارنالعان زاتتاردى تاراتتى. بىرلەسكەن ەڭبەكتىڭ ارقاسىندا جاعدايدى تۇراقتاندىرا الدىق» دەپ اتاپ ءوتتى التاي كولگىنوۆ.
مەملەكەت باسشىسى قايىرىمدىلىق, ۆولونتەرلىك ۇيىمدار جانە بيزنەس سالاسى وكىلدەرىمەن ونلاين كەزدەسۋدە قايىرىمدىلىق پەن ۆولونتەرلىك پاندەميا كەزىندە جالپىۇلتتىق دەڭگەيگە جەتىپ, الەۋمەتتىك نورماعا اينالا باستاعانىن ايتتى. پرەزيدەنت ۆولونتەرلىك قىزمەتتى دامىتۋ, قايىرىمدىلىق جانە مەتسەناتتىقتى قولداۋ – مەملەكەتتىڭ ۇزاق مەرزىمدى باسىمدىعى ەكەنىن اتاپ ءوتتى. ەلباسى باستاماسى بويىنشا قۇرىلعان «ءبىز بىرگەمىز» قورى مىڭداعان وتباسىعا قارجىلاي كومەك كورسەتتى, قالالىقتار جوعارى الەۋمەتتىك جاۋاپكەرشىلىك تانىتتى» دەپ جازدى ەلوردا اكىمى ءوزىنىڭ ينستاگرام پاراقشاسىندا.
كەزدەسۋدە قۇرامىنا ۆولونتەرلىك ۇيىمدار مەن قوزعالىستاردىڭ بارلىق وكىلى كىرەتىن بىرىڭعاي پلاتفورما قۇرۋ ماسەلەسى تالقىلاندى. بۇل ەشكىم شەت قالماس ءۇشىن مۇقتاج ادامدارعا جەكە-جەكە كومەك كورسەتۋگە مۇمكىندىك بەرەدى. بۇعان قوسا بولىنگەن كومەكتىڭ اشىقتىعى قامتاماسىز ەتىلەدى. سونداي-اق جيىندا ۆولونتەرلىك ۇيىمداردى دامىتۋ جانە قولداۋدىڭ بىرقاتار باعىتتارى جايلى ءسوز قوزعالدى.
سوڭىنان قالا باسشىسى پرەزيدەنت اتىنان بەلسەندى ەرىكتىلەر مەن ازاماتتارعا «حالىق العىسى» مەدالىن تابىستادى. قيىن كەزەڭدە ايانباي ەڭبەك ەتكەن جاندارعا العىس ايتتى.
