«حان شاتىر» – الىپ ءمولدىر شىنىدان جاسالعان الەمدەگى ەڭ ءىرى شاتىر. ەلوردادا بوي كوتەرگەن عيمارات قالا كۇنىنە وراي 2010 جىلى 6 شىلدەدە اشىلعان. ەلباسىنىڭ يدەياسىن جۇزەگە اسىرۋ ايگىلى بريتاندىق ساۋلەتشى لورد نورمان فوستەرگە تاپسىرىلدى.
ەلىمىزدەگى ەرەكشە پىشىندەگى «حان شاتىر» ساۋدا, ويىن-ساۋىق ورتالىعى ەلوردانىڭ عاجايىپ عيماراتتارىنىڭ تىزىمىنە ەنىپ,
11 جىلدىڭ ىشىندە استانا سيمۆولدارىنىڭ بىرىنە اينالدى.
نورمان فوستەردىڭ قيالىنان شىققان ساۋلەت تۋىندىسى – ءبىر شاتىردىڭ استىندا الەم دەڭگەيىندەگى ساۋدا, ويىن-ساۋىقتى بىرىكتىرگەن ەلورداداعى بىرەگەي ورتالىق. نىسان كۇن ساۋلەسىن وتكىزەتىن ءمولدىر شىنىدان جانە پوليمەرلى جابىنمەن بەكىتىلگەن بولات تەمىر ارقاننان قۇراستىرىلعان. ارنايى حيميالىق قۇرام شاتىردىڭ كەڭىستىگىن تەمپەراتۋرانىڭ اۋىتقۋىنان قورعاپ, نىسان ىشىندەگى ميكروكليماتتى ساقتاپ تۇرادى. وسى جانە وزگە دە تەحنولوگيالاردىڭ ارقاسىندا «حان شاتىر» الەمدەگى ون ەكو-عيماراتتىڭ قاتارىنا ەندى. بۇل تۋرالى Forbes Style جۋرنالى جازدى.
«حان شاتىر» سوو استانالىقتار مەن قالا قوناقتارىنا امبەباپ دۇكەنى, وتباسى ساياباعى, مەيرامحانالار, كينوتەاتر, سپورت زالدارى, جاساندى جاعاجاي مەن باسسەينى بار اكۆاپارك, قىزمەت جانە كەڭسە ورىندارى, 700 ورىنعا ارنالعان پاركينگ قىزمەتىن ۇسىنادى.
بىرەگەي ورتالىق كۇمبەزىنىڭ استىندا مالديۆ ارالدارىنان ارنايى اكەلىنگەن جۇمساق قۇم توسەلگەن, تروپيكالىق وسىمدىكتەرى بار جابىق جاعاجاي ورنالاسقان. حاۋىزداردىڭ بىرىندە ورنالاسقان جاساندى تولقىن ناعىز تەڭىز جاعالاۋىندا دەمالىپ جاتقانداي سەزىمگە بولەيدى. بۇل جەردە جىلدىڭ كەز كەلگەن مەزگىلىندە ەلوردالىقتار مەن قالا قوناقتارى دەمالادى. اكىمشىلىكتىڭ مالىمەتىنە سايكەس, دەمالىس كۇندەرى «حان شاتىرعا» شامامەن 30 مىڭ ادام باس سۇعادى.
شاتىر قۇرىلىسى 2006 جىلى باستالىپ, 4 جىلعا سوزىلدى. عيماراتتىڭ باس ديرەكتورى ەنگين اسرالاننىڭ ايتۋىنشا, اۋەلدەن قۇرىلىس 2 جىلعا جوسپارلانعان ەدى. الايدا كۇن رايىنىڭ قولايسىزدىعى مەن كۇتپەگەن قيىندىقتار قۇرىلىس مەرزىمىن ۇزارتتى.
2010 جىلى «حان شاتىر» قازاقستان رەسپۋبليكاسى پرەزيدەنتىنىڭ «التىن ساپا» سىيلىعىن ۇتىپ الدى. ال 2014 جىلى ساۋلەت ونەرىن دامىتۋعا, بەيبىتشىلىكتى جانە حالىقتار اراسىنداعى دوستىقتى, ءوزارا سەنىمدى نىعايتۋعا قوسقان ەرەكشە ۇلەسى ءۇشىن ساۋلەتشى نورمان فوستەرگە قر تۇڭعىش پرەزيدەنتىنىڭ – ەلباسىنىڭ مەملەكەتتىك بەيبىتشىلىك جانە پروگرەسس سىيلىعى بەرىلدى.
«حان شاتىر» ساۋدا, ويىن-ساۋىق ورتالىعى الەمدەگى شاتىرلى ەڭ بيىك عيمارات رەتىندە گيننەسس رەكوردتار كىتابىنا ەنگەن.
