ەلىمىزدە سايلاۋدىڭ ءادىل جانە ادال ءوتۋىن باقىلاۋ تۋرالى ارنايى حارتيا قابىلداندى.
«بۇل حارتيادا ادام قۇقىقتارىنىڭ جالپىعا بىردەي دەكلاراتسياسىنىڭ, بۇۇ-نىڭ ازاماتتىق جانە ساياسي قۇقىقتار تۋرالى حالىقارالىق پاكتىسىنىڭ, كوپەنگاگەن كەڭەسىنىڭ قۇجاتىندا كورىنىس تاپقان ەقىۇ پرينتسيپتەرىنىڭ, دەموكراتيالىق سايلاۋ ستاندارتتارى تۋرالى كونۆەنتسيانىڭ, ەلىمىزدىڭ كونستيتۋتسياسى مەن ۇلتتىق زاڭنامانى نەگىزگە الا وتىرىپ, سايلاۋدىڭ ماڭىزى مەن ءرولى كورسەتىلگەن. ءبىز سايلاۋ پروتسەسىنە قاتىسۋشى, ياعني باقىلاۋشى رەتىندە ازاماتتاردىڭ سايلاۋ قۇقىقتارى مەن بوستاندىقتارىن قورعاۋدى قامتاماسىز ەتپەكپىز» دەدى قوعام قايراتكەرى, اتالعان حارتيا يدەياسىنىڭ اۆتورى ايگۇل سولوۆەۆا كەشە ەلوردادا وتكەن ءباسپاسوز ءماسليحاتىندا.
ونىڭ ايتۋىنشا, اتالعان حارتيا سايلاۋ پروتسەسىنىڭ ءادىل وتۋىنە باقىلاۋ جۇرگىزۋمەن قاتار, ىشكى جانە حالىقارالىق باقىلاۋشىلارمەن ءوزارا ىنتىماقتاسۋ ماقساتىن كوزدەيدى. «وسى حارتيا نەگىزىندە دەموكراتيالىق, شىنايى, ەركىن جانە ءادىل سايلاۋ ارقىلى حالىقتىڭ كۇشى مەن ەرىك-جىگەرىن ءبىلدىرۋ ءۇشىن سايلاۋ پروتسەسىن باقىلاۋدى ۇيىمداستىرامىز.
سونىمەن قاتار, بۇل قۇجاتتا سايلاۋ تۋرالى زاڭنامانى تالداۋ, سايلاۋ الدىنداعى ناۋقانعا مونيتورينگ جۇرگىزۋ جانە سايلاۋ كەزىندە ورىن الۋى مۇمكىن زاڭ بۇزۋشىلىقتاردى قاداعالاۋ جانە زەرتتەۋ ماسەلەسى قاراستىرىلعان» دەدى ا.سولوۆەۆا.
حارتيا يدەياسى اۆتورىنىڭ پىكىرىنشە, سايلاۋعا باقىلاۋ جۇرگىزۋ كەزىندە قر كونستيتۋتسياسى, سايلاۋ تۋرالى زاڭ جانە سايلاۋدا باقىلاۋدى جۇزەگە اسىرۋعا قاتىستى حالىقارالىق اكتىلەر باسشىلىققا الىناتىن بولادى. بۇل ءىس-شارانى ەلورداداعى سايلاۋدى بەيپارتيالىق بايقاۋ ورتالىعى ۇيىمداستىردى.
