ەلوردانىڭ ۇكىمەتتىك ەمەس ۇيىمدارى مەن باستاماشىل تۇرعىندارى قالانىڭ الەۋمەتتىك ورتاسىن جاقسارتۋعا ءوز ۇلەستەرىن قوسا الادى. نۇر-سۇلتان قالاسىنىڭ «ازاماتتىق باستامالار ورتالىعى» بەلسەندىلەر مەن ۇكىمەتتىك ەمەس ۇيىمدارعا يدەيانى جوباعا اينالدىرۋعا, ونى ىسكە اسىرۋعا كومەك كورسەتەدى.
ءوتىنىش بەرگەندەرگە زاڭگەرلىك, قارجىلىق جاعىنان كەڭەس بەرىلەدى. ورتالىقتا باستاماشىل ازاماتتارعا الەۋمەتتىك جوبانىڭ يدەياسىن جۇزەگە اسىرۋعا قولداۋ كورسەتىلىپ, كەيىن ول گرانت الۋعا نەمەسە باعدارلامالار بايقاۋىنا جىبەرىلەدى.
ورتالىقتىڭ قاتىسۋىمەن جۇزەگە اسىرىلاتىن جوبالار نەگىزىنەن ەرەكشە بالالار تاربيەلەنەتىن وتباسىلاردىڭ, حالىقتىڭ الەۋمەتتىك وسال توپتارىنىڭ, كوپبالالى وتباسىلاردىڭ ءومىرىن جاقسارتۋعا باعىتتالادى. سونداي-اق ەكولوگيا, ينكليۋزيۆتى ءبىلىم بەرۋ, ۇلتتىق بىرەگەيلىكتى جاڭعىرتۋ ماسەلەلەرى بويىنشا يدەيالار ىسكە اسىرىلادى.
يدەيانى نەمەسە جوبانى جۇزەگە اسىرۋ ءۇشىن ۇەۇ جانە «ازاماتتىق باستامالار» سايتىندا كەڭەس الۋعا ءوتىنىم قالدىرا الادى نەمەسە 8 7172 32 35 19, 8 771 050 15 37, 8 708 800 28 87 نومىرلەرىنە حابارلاسۋعا بولادى.
