جەرگىلىكتى اتقارۋشى ورگانداردىڭ وڭىرلەردەگى وكىلدەرى نۇر-سۇلتان قالاسى اكىمدىگىنىڭ قالالىق iKOMEK109 مونيتورينگ جانە جەدەل ارەكەت ەتۋ ورتالىعىنىڭ تاجىريبەسىمەن تانىستى.
iKOMEK109 ورتالىعىن تانىستىرۋ بارىسىندا قوناقتار 109 ينتەللەكتۋالدى بايلانىس ورتالىعىنىڭ, بىرىڭعاي قالالىق بەينەباقىلاۋ جۇيەسى مەن تالداۋ ورتالىعىنىڭ جۇمىسى كورسەتىلدى. وتكەن جىلدىڭ باسىنان بەرى ورتالىققا ميلليوننان اسا ءوتىنىش تۇسسە, ونىڭ 77 پايىزى بىردەن شەشىلگەن ەكەن. ال بيىل 570 مىڭ ءوتىنىش قابىلدانىپتى.
– وتىنىشتەردىڭ نەگىزگى لەگى (74 پايىز) 109 تەلەفون ءنومىرى ارقىلى كەلىپ تۇسەدى. ال ءبىر اي بۇرىن بۇل كورسەتكىش 85 پايىزعا جەتتى. ناۋرىز ايىنان باستاپ وتىنىشتەردى +7(747)1090109 WhatsApp ءنومىرى ارقىلى دا قابىلدايتىنىمىزدى جاريالاعانبىز. ال بۇعان دەيىن تەلەگرام, اكىمدىك سايتى, ءموبيلدى قوسىمشا ارقىلى ءوتىنىش بەرۋ تاسىلدەرى جۇمىس جاساپ كەلگەن, – دەدى iKOMEK109 ورتالىعىنىڭ باسشىسى جاننات ءدۇبىروۆا.
مۇنان باسقا, iKOMEK109 ورتالىعى اياسىنداعى ستراتەگيالىق KPIs, ەلوردانى دامىتۋ جوبالارى, ازاماتتاردىڭ وتىنىشتەرىمەن جۇمىس ىستەۋ سەكىلدى قالانى باسقارۋداعى باستى ماسەلەلەر تولىقتاي تسيفرلانعان جانە ولارعا ونلاين تۇردە مونيتورينگ جاسالادى.
ايتا كەتەيىك, قالا تۇرعىندارىنا قىزمەت كورسەتەتىن 17 اكىمدىك باسقارماسى, 33 كوممۋنالدىق جانە اۆاريالىق قىزمەتتەر, 81 ليفت شارۋاشىلىعى, 605 پيك جانە 13 مەملەكەتتىك مەديتسينالىق ۇيىم قازىر ءبىر عانا «109» نومىرىمەن الماستىرىلعان.
