كەشە دەنساۋلىق ساقتاۋ ءمينيسترى الەكسەي تسوي قازاقستانداعى كارانتين شارالارىنىڭ ناتيجەسى تۋرالى ماعلۇمات بەردى. مينيستر الدىمەن كارانتيننىڭ ارقاسىندا ەلدە كوروناۆيرۋس جۇقتىرۋدىڭ تاۋلىكتىك تىركەلۋ جاعدايى 2,5 ەسەگە ازايعانىن ءمالىم ەتتى.
«قازىر جازدىڭ ورتاسىنان وتتىك. كوكتەمدەگى قيىن جاعدايدان كەيىن ەلدىڭ شارشاعانىن ءبارىمىز تۇسىنەمىز. الايدا ماسكا رەجيمىن ساقتاۋ – اسا قاجەتتى شارا. حالىقارالىق تاجىريبەنى ەسەپكە الا وتىرىپ, كەشە عانا ءبىز ماسكا تاعۋعا قاتىستى ەرەجەلەرگە تىڭ وزگەرىستەر ەنگىزدىك. اتاپ ايتقاندا, بەس جاسقا دەيىنگى بالالارعا, جەكە سپورتتىق جاتتىعۋ جاساپ جۇرگەن ازاماتتارعا, جالپى تاماقتاناتىن ورىنداردا تاماق ءىشۋ بارىسىندا ماسكا تاعۋعا مىندەتتەمەۋ تۋرالى وزگەرىس ەنگىزىلدى. الايدا بۇل جاعدايلاردا الەۋمەتتىك قاشىقتىق قاتاڭ ساقتالۋى كەرەك» دەدى الەكسەي تسوي ورتالىق كوممۋنيكاتسيالار قىزمەتىندە وتكەن بريفينگتە.
«جالپى, بۇكىل الەمدە كۇزدە جانە قىستا جۇقتىرىلعان رەسپيراتورلى ۆيرۋستى ينفەكتسيا (جرۆي), تۇماۋ اۋرۋلارىنىڭ ءورشىپ كەتەتىنى بەلگىلى. ەندى ولارعا كوروناۆيرۋس ينفەكتسياسى دا قوسىلىپ وتىر. سول سەبەپتى قازىرگى ۋاقىتتا جاعدايدىڭ بۇلايشا ورشۋىنە بارىنشا دايىندالىپ جاتىرمىز. تۇماۋعا قارسى جىل سايىن جۇرگىزىلەتىن ماۋسىمدىق ۆاكتسيناتسيا جوسپارلانعان. سونىمەن قاتار دەنساۋلىق ساقتاۋ مينيسترلىگى رەزەرۆتەگى توسەك ورىنداردى دا دايىنداپ جاتىر. پتر-تەستتار بويىنشا قوسىمشا قور ازىرلەنۋدە. قويمالاردا ءدارى-دارمەك قورى دا جينالۋدا» دەدى ا.تسوي.
سونىمەن قاتار الەكسەي تسوي قازاقستاندا كوروناۆيرۋس ينفەكتسياسىن جۇقتىرۋدىڭ جاعدايلارىن تىركەۋ بويىنشا جاڭا ستاتيستيكاسىنىڭ ارتىقشىلىقتارىن اتاپ ايتتى.
«دۇنيەجۇزىلىك دەنساۋلىق ساقتاۋ ۇيىمىنىڭ ەۋروپا بويىنشا ايماقتىق بيۋروسىمەن بىرقاتار تەحنيكالىق كونسۋلتاتسيالار وتكىزىلدى. قازىر اۋرۋلاردىڭ كودتارىنىڭ جاڭا حالىقارالىق جىكتەلۋى بويىنشا COVID-19 جاعدايلارىن كودتاۋعا جانە ەسەپكە الۋعا كوشتىك. 1 تامىزدان باستاپ زەرتحانالىق راستالعان COVID-19 جاعدايلارى, سونىڭ ىشىندە پتر تەرىس ناتيجەسى بار پنەۆمونيا جاعدايلارى بىرىكتىرىلدى» دەدى مينيستر.
ءمينيستردىڭ ايتۋىنشا, بۇل ءادىس اۋرۋعا قاتىستى احۋالدى دۇرىس بولجاپ-بىلۋگە, قاجەتتى رەسۋرستاردى, ءدارى-دارمەكتى دۇرىس جوسپارلاۋعا, ماماندار مەن توسەك ورىنداردى, مەديتسينالىق بۇيىمداردى, جالپى ستاتيستيكانىڭ اشىقتىعىن قامتاماسىز ەتۋگە مۇمكىندىك بەرەدى.
بريفينگ بارىسىندا مينيستر قازاقستاندا كارانتين شارالارى بىردەن الىنىپ تاستالمايتىنىن, كەزەڭ-كەزەڭىمەن جەڭىلدەتىلەتىنىن دە باسا ايتتى. «ەگەر اۋرۋ تاعى دا كۇرت ءوسىپ كەتسە, ءبىز قوسىمشا شارالار ەنگىزەمىز» دەپ اتاپ ءوتتى مينيستر.
