كەشە ەلوردادا كوپسالالى مەديتسينالىق ورتالىقتىڭ ىشىنەن ينسۋلت ورتالىعى اشىلدى. بۇل شاراعا قالا اكىمىنىڭ ورىنباسارى باقتيار ماكەن قاتىسىپ, قىزمەت كورسەتۋ ستاندارتتارىمەن تانىستى.
حالىققا مەديتسينالىق قىزمەت كورسەتۋ ستاندارتتارىنا سايكەس, ەلوردادا ءار 250 مىڭ ادامعا شاققاندا ءبىر ينسۋلت ورتالىعى بولۋى كەرەك. جاڭادان بوي كوتەرگەن ورتالىق ەندىگى كۇنى بايقوڭىر اۋدانىنىڭ تۇرعىندارىنا قىزمەت كورسەتەدى.
مۇندا سونىمەن قاتار, ماگنيتتى-رەزونانستىق توموگراف ىسكە قوسىلدى. بۇل جابدىق مەملەكەتتىك بيۋدجەتتىڭ ەسەبىنەن ساتىپ الىنعان. توموگراف قان-تامىر تۇتىكشەلەرىن تولىقتاي زەرتتەۋگە مۇمكىندىك بەرەدى. ول ءينسۋلتتىڭ الدىن الۋ جانە ەمدەۋ ءۇشىن اسا قاجەت.
– ينسۋلت ەمىنىڭ ءبىرىنشى تالابى – دەرت تيگەن ادامعا 1 ساعات ىشىندە كومەك كورسەتىپ ۇلگەرۋ كەرەك. دەر كەزىندە جاسالعان ەم ادامنىڭ كەيىن مۇگەدەك بولىپ قالماۋىنا, دەنساۋلىعىنىڭ تولىقتاي قالپىنا كەلۋىنە تىكەلەي اسەر ەتەدى. اشىلىپ وتىرعان ورتالىق ينسۋلتكە قارسى جاسالاتىن قاجەتتى قۇرال-جابدىقتارمەن, مەديتسينالىق ماماندارمەن جەتكىلىكتى تۇردە قامتاماسىز ەتىلگەن, – دەدى كوپسالالى مەديتسينالىق ورتالىقتىڭ ديرەكتورى مۇحتار تولەۋتاەۆ.
ينسۋلت ورتالىعى ايىنا 50-60 ناۋقاستى قابىلداۋعا قابىلەتتى. مۇندا ينسۋلتكە شالدىققانداردى ساۋىقتىرۋدىڭ ءبىرىنشى, ەكىنشى كەزەڭدىك دارىگەرلىك كومەگى كورسەتىلەدى. بولاشاقتا وسىندا ناۋقاستاردى ەمدەۋدىڭ تولىق تسيكلى جۇزەگە اسىرىلاتىن بولماق.
