قالا اكىمى التاي كولگىنوۆتىڭ توراعالىعىمەن وتكەن ينۆەستيتسيا ماسەلەلەرى جونىندەگى وڭىرلىك كەڭەستە ءبىلىم بەرۋ, دەنساۋلىق ساقتاۋ, سپورت جانە ونەركاسىپ سالاسى بويىنشا 12 جوبا تانىستىرىلدى. اتالعان جوبالار جۇزەگە اسقاندا 1 مىڭنان استام جۇمىس ورنىن اشىلاتىن بولادى.
– جەكە ينۆەستيتسيالار ەسەبىنەن جالپى ءبىلىم بەرەتىن ورتالىق, ءتورت مەكتەپ سالۋ جوسپارلانىپ وتىر. 2-ءشى بازادا بالاباقشالار جۇمىس ىستەيتىن بولادى. بۇل جوبالار 4,5 مىڭ وقۋشى ورنىن قۇرۋعا مۇمكىندىك بەرەدى,– دەدى اكىم.
مىسالى, «International School of Nur-sultan City» جشس فيندىك ءبىلىم بەرۋ ادىستەمەسى نەگىزىندە جەكە مەكتەپ سالماقشى. جۇيەنىڭ ەرەكشەلىگى – ءار بالاعا جەكە وقىتۋ جوسپارى جاسالادى. مەكتەپتە جابىق باسسەين جانە فۋتبول الاڭى بولادى.
كەڭەستە, سونداي-اق مەديتسينالىق ورتالىق, سپورت كەشەنى مەن كوكونىس ساقتاۋ قويماسى قۇرىلىسىنىڭ جوبالارى دا قولداۋ تاپتى. سونىمەن قاتار ونەركاسىپ سالاسىندا جاڭا جوبالار قارالدى. ولار: اسفالت-بەتون زاۋىتى, تەمىر-بەتون بۇيىمدارى زاۋىتى جانە كوممۋنالدىق ارنايى تەحنيكا شىعاراتىن زاۋىت.
ەلوردادا قازىر 21,8 ميلليارد تەڭگە سوماسىنا 6 ينۆەستيتسيالىق كەلىسىم-شارت جاسالدى: ەت وڭدەۋ كەشەنىنىڭ قۇرىلىسى بويىنشا, مەديتسينا سالاسىندا ءبىر-بىردەن جانە ءبىلىم بەرۋ سالاسىندا جەكە مەنشىك مەكتەپتەر قۇرىلىسى بويىنشا 4 جوبا بار.
