بۇگىندە ەلىمىزدە ەكىنشى دەڭگەيلى بانكتەن يپوتەكالىق نەسيەگە ءۇي الىپ, ەندى ونىڭ اي سايىنعى تولەمىن تولەي الماي ءجۇرگەندەر بارشىلىق. جالعىز باسپاناسىنىڭ قارىزىن جابا الماي, جابىعىپ جۇرگەن جاندارعا ەندى مەملەكەت قول ۇشىن بەرمەك.
2015 جىلعى 11 اقپاندا ۇكىمەتتىڭ كەڭەيتىلگەن وتىرىسىندا ەلباسى ۇلتتىق بانككە ۇكىمەتپەن بىرلەسىپ, يپوتەكالىق قارىز الۋشىلاردىڭ پروبلەماسىن شەشۋ جونىندە شارالار كەشەنىن ازىرلەۋدى تاپسىرعان بولاتىن. وسىعان وراي ۇلتتىق بانك ەكىنشى دەڭگەيلى بانكتەردىڭ يپوتەكالىق تۇرعىن ءۇي قارىزدارىن قايتا قارجىلاندىرۋعا 130,0 ملرد تەڭگە ءبولدى.
مەملەكەتتەن بەرىلەتىن كومەك جايىندا كەشە پارلامەنت ماجىلىسىندە قر ۇلتتىق ەكونوميكا ءمينيسترى قۋاندىق بيشىمباەۆ حاباردار ەتتى. «جەكە بلوكتا قارجىلىق سەكتور بويىنشا تۇزەتۋلەر كوزدەلگەن. ولار «قايتا قارجىلاندىرۋ باعدارلاماسى» شەڭبەرىندە يپوتەكالىق تۇرعىن ءۇي قارىزدارى بويىنشا بانكتەر الدىندا مەرزىمىنەن كەشىكتىرىلگەن بەرەشەگى بار قارىز الۋشىلارعا كومەك كورسەتۋگە باعىتتالعان. بۇل اتالمىش باعدارلامانى ىسكە اسىرۋعا كەدەرگى كەلتىرىپ تۇرعان پروبلەمالىق ماسەلەلەردى شەشىپ, حالىقتىڭ الەۋمەتتىك وسال توپتارىنىڭ جالعىز تۇرعىن ءۇيىن ساقتاپ قالۋعا مۇمكىندىك بەرەدى» دەيدى قۋاندىق بيشىمباەۆ.
