يتاليا پاۆيلونىندا بولعان جان ۋاقىت شەكاراسىن ۇمىتىپ, ادامزات دامۋىنا ەلەۋلى ۇلەس قوسقان ءتورت دانىشپاننىڭ ەسىمدەرىمەن اتالاتىن نەگىزگى ءتورت زالدى ارالاعان سايىن سول زامانداردىڭ اراسى جاقىنداعانداي اسەر قالدىرادى. الدىمەن وسىنداي سىرشىل الەمدى كورەرمەندەرگە تارتۋ ەتكەندەردىڭ ەسىمىن قۇرمەتپەن ايتىپ وتپەسكە بولماس.
ولار كوركەمدىك جاعىن باسقارعان فابريتسيو مامبرو, يتاليالىقتاردىڭ ەنەرگيا تۋرالى تۇسىرگەن بەينەكورىنىسىن جۇزەگە اسىرعان دجوۆانني پيپەرنو, بۇكىل پاۆيلوننىڭ ساۋند-ديزاينىن جاساعان موكادەليك توبىنا, پاۆيلوننىڭ يلليۋستراتسياسى اندرەا مينيني (Andrea Minini) مەن يزابەللا بەرسەلليني جانە باسقالارى ارالاسىپتى.
ۇلتتىق دەڭگەيدە دە جانە جاھاندىق اۋقىمدا دا ءوز مىندەتتەرىن ورىنداۋدا يتاليانىڭ دا ءوز جولى بار. وسىدان ەكى جىل بۇرىن, 2015 جىلى, كليماتتىڭ وزگەرۋىمەن كۇرەسى, كەدەيشىلىكتىڭ تارالۋىن توقتاتۋ, عالامشارىمىزدى قورعاۋعا, جاھاندىق گۇلدەنۋىن قامتاماسىز ەتۋگە الەم بويىنشا بۇۇ-نىڭ 2030 جىلعا دەيىن تۇراقتى دامۋ جانە كليماتتىڭ وزگەرۋى تۋرالى پاريج كەلىسىمى قۇجاتتارى قابىلدانعان بولاتىن. «وسى باعىتقا ارنالعان ءاربىر جوبالار مەن اتقارىلىپ جاتقان ىستەرىمىز بۇدان دا ادەمى ادىلەتتى الەمگە قول جەتكىزۋگە قوسقان ۇلەسىمىز» دەيدى يتاليالىقتار.
ولاردىڭ ەنەرگيانى تابۋدىڭ جانە پايدالانۋدىڭ جاڭا ادىستەرىمەن, اسا تۇراقتىلىق پەن تيىمدىلىگى زور ءبىزدىڭ ايماقتارىمىزدىڭ جۇزدەگەن كەلەشەكتى جوبالارى وسىنى دالەلدەيدى.
ەكسپو-2017 تاقىرىبىنىڭ تەرەڭ ءمانىن بايانداۋ ءۇشىن «تاريح» جانە «اقىل-پاراسات» ۇعىمدارىن وزەك ەتىپتى. ەنەرگيا دەگەن نە؟ ول نە ءۇشىن قىزمەت ەتەدى؟ راسىندا دا, جاۋابى ايقىن كورىنگەنمەن, ءمانى تەرەڭدە. قىسقاشا ايتقاندا, ەنەرگيا ءومىرىمىزدى باقۋاتتاندىرىپ, وركەندەپ دامۋىمىزعا قىزمەت ەتەدى. جانە حالىقتىڭ جايلاعان جەرى, ەل تاريحى, تابيعاتىنىڭ بۇگىنگى كەلبەتى وسىعان دالەل دەپ ۇتىمدى كورسەتە بىلگەن. پاۆيلونداعى انتونيو پاچينوتتي الاڭى – ەنەرگيا يتالياسى, ەنريكو فەرمي الاڭى – يتاليالىقتار ەنەرگياسى, الەسساندرو ۆولتتىڭ الاڭى – ايماق ەنەرگياسى – يتاليالىقتار, لەوناردو دا ۆينچي الاڭى – «اقىل-پاراسات» ەنەرگياسى دەپ ءبولىپ كورسەتكەن زالدار ويعا تامىزىق تاستايدى.
«ءبىز بۇل تۇبەكتە مىڭداعان جىلدار بويى ءومىر ءسۇرىپ كەلەمىز. ءبىز تۇبەكتىڭ بۇزىلۋىنا جول بەرمەۋ ءۇشىن تىرشىلىك ەتۋدىڭ تۇراقتى ءادىسىن جانە جەر بايلىقتارىن پايدالانۋعا قولايلى تەحنولوگيالاردى جەتىلدىرە تۇستىك. كەرەمەت ەلىمىزدىڭ عاجايىپ تابيعاتىن, مادەنيەت پەن تەحنولوگيالىق جەتىستىكتەردى بارشاعا پاش ەتەتىن, ءۇش ايعا سوزىلاتىن قىزىقتى ساياحاتتى تاماشالاۋعا شاقىرامىز. 360°-تىق ەرەكشە تۇسىرىلىمدەر ارقاسىندا پاۆيلون قوناقتارىن وتانىمىزدى تانىستىرامىز», – دەپ تۇجىرىمدايدى.
پاۆيلوننىڭ سوڭعى زالىندا يتاليالىق سينحروندى ءجۇزۋ كومانداسى ورىندايتىن سيرەنالاردىڭ ءبيى دە اسەرلى.شىعا بەرىستە ءسال كىدىرىڭىز. قاتار ورنالاسقان ءمولدىر قالقانداردىڭ قاسىنا كەلىپ قۇلاق تۇرسەڭىز, ادامدار پايدا بولىپ, سويلەي جونەلەدى. ءسوز بىرەۋ عانا – جاڭا عاسىردىڭ ەنەرگيا كوزدەرىنىڭ يگىلىكتەرى.
ايگۇل ۋايسوۆا
