كەشە نۇر-سۇلتان قالاسىنداعى دوستىق ۇيىندە قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ يتاليا پارلامەنتى دەپۋتاتتار پالاتاسىنىڭ دەپۋتاتى ەمانۋەلا روسسينيمەن كەزدەستى.
كەزدەسۋ بارىسىندا ەلباسى نۇرسۇلتان نازارباەۆتىڭ قوعامدىق كەلىسىم مەن ۇلتتىق بىرلىكتىڭ قازاقستاندىق مودەلى, سونداي-اق نۇر-سۇلتان قالاسىنىڭ دوستىق ءۇيى مەن ەتنومادەني بىرلەستىكتەردىڭ جۇمىسى تانىستىرىلىپ, قازاقستان مەن يتاليا اراسىنداعى مادەني-گۋمانيتارلىق ىنتىماقتاستىق اياسىندا ەكىجاقتى بايلانىستاردى نىعايتۋ جانە كەڭەيتۋ ماسەلەلەرى تالقىلادى.
ەكى جاقتى كەزدەسۋدە جانسەيىت تۇيمەباەۆ قازاقستان اسسامبلەياسىنىڭ قۇرىلۋى, وركەندەۋ بارىسىن جانە ونىڭ قازاقستاننىڭ ورنىقتى دامۋىندا اتقارىپ وتىرعان ماڭىزدى ءرولىن اتاپ وتسە,
ەمانۋەلا روسسيني قازاقستانداعى بىرلىك پەن بەرەكەنىڭ كورىنىسى بولعان اسسامبلەيانىڭ ماڭىزىن جوعارى باعالادى.
«كەشەدەن بەرى جوعارى وقۋ ورىنداعى, مەكتەپتەردەگى ءبىلىم بەرۋ جاعدايىمەن تانىستىم. بۇل ەلدە جاس جەتكىنشەكتەردىڭ ءبىلىم الۋىنا جاقسى مۇمكىندىك جاسالعان. ال اسسامبلەيا جايلى ايتساق, كوپۇلتتى قازاقستاندا بارلىق ۇلتتىڭ مۇددەسى تولىق قامتاماسىز ەتىلىپ, ولاردىڭ ءوز مادەنيەتىن, ۇلتتىق ەرەكشەلىگىن ساقتاۋعا كوپ مۇمكىندىك بەرىلگەن» دەدى يتاليالىق دەپۋتات.
