ەحرو قالاشىعىنداعى يتاليانىڭ ۇلتتىق كۇنى تانىمال يتاليالىق كەرنەيشى نەللو سالتسا باسقاراتىن ءانسامبلدىڭ مەرەكەلىك كونتسەرتىمەن ەستە قالدى.
ءىس-شارانىڭ رەسمي بولىگى ەكى ەلدىڭ تۋىن كوتەرىپ, ۇلتتىق ءانۇراندارىن ورىنداۋمەن باستالدى. سالتاناتتى اشىلۋ راسىمىندە يتاليانىڭ ەكونوميكالىق دامۋ ءمينيسترىنىڭ ورىنباسارى يۆان سكالفاروتتو قۇتتىقتاۋ ءسوز سويلەدى. ول قوناقتاردى قۇتتىقتاي وتىرىپ, ەحرو كورمەسى باسقا ەلدەرمەن, سونىڭ ىشىندە قازاقستانمەن ىنتىماقتاستىق بايلانىس ارقىلى جاڭعىرمالى قۋات كوزدەرى سەكتورىن دامىتۋعا سەرپىن بەرەتىنىن اتاپ ءوتتى.نەللو سالتسا ءانسامبلى مەن گۇلميرا قۇتتىباداموۆا باسقارعان استانا قالالىق فيلارمونياسى كامەرالىق حورىنىڭ ورىنداۋىنداعى تۋىندىلار كورەرمەن كوڭىلىنەن شىقتى.
نەللو سالتسا سانتا چەچيليا اكادەمياسىنىڭ وركەسترىمەن بىرگە دۇنيەنىڭ ءتورت بۇرىشىن شارلاپ شىققان. وسىلايشا حوسە كاررەراس, پلاسيدو دومينگو, ريچارەللي, اندرەا بوچەللي, مادۋنو جانە باسقا دا الەمدىك دەڭگەيدەگى جۇلدىزدارمەن ءبىر ساحنادا تۇرىپ, ونەر كورسەتكەن. نەللو سالتسا يتاليا كينەماتوگرافياسىمەن بايلانىستا بولعان. «ءومىر تاماشا», «سپرۋت», «امەريكادا بولعان حيكايا» سىندى فيلمدەردەگى ساۋندترەكتەردىڭ جازباسىنا قاتىسقان. مىنە, ەل ەسىندە قالعان ەسكى اۋەندەر ۇلتتىق كۇن ساحناسىندا ورىندالدى.
2016 جىلى كۆەنتين تارانتينو تۇسىرگەن «جەكسۇرىن سەگىزدىك» اتتى ۆەستەرنگە ارنايى جازىلعان ەننيو موريككونەنىڭ مۋزىكاسىن كەرنەيشى نەللو سالتسا ورىنداپ شىققان. ال ساۋندترەك «وسكار» سىيلىعىن يەلەندى.مۋزىكانتتاردىڭ كونتسەرتىنەن كەيىن يتاليالىق دەلەگاتسيا قازاقستاننىڭ «نۇر الەم» پاۆيلونىن ارالاپ شىقتى. مەرەكەلىك شارا سالتسا ءانسامبلى ورىنداعان مۋزىكامەن جانە مەملەكەتتىك اكادەميالىق فيلارمونيا ورىنداعان يتاليالىق اندەرمەن ءتامامدالدى.
قازاقستانداعى يتاليا ەلشىسى مەن پاۆيلوننىڭ كوميسسارى ستەفانو راۆانياننىڭ ايتۋىنشا, كورمە اياسىندا يتاليانىڭ 20 ءوڭىرىنىڭ 15-ءى جاسىل ەنەرگەتيكا سالاسىنداعى ءوز جەتىستىكتەرىن تانىستىردى. سونداي-اق, پاۆيلون الاڭىندا عارىش ونەركاسىبى جانە كولىك سالاسىنا قاتىستى ماڭىزدى ءىس-شارالار وتكىزىلدى. وسى ورايدا شىلدە ايىندا يتاليانىڭ «Bionet SRL» كومپانياسى «KAZAKH INVEST» كومپانياسىمەن استانادا زاۋىت سالۋ تۋرالى مەموراندۋمعا قول قويعانىن اتاپ ءوتۋ كەرەك.
– يتاليانىڭ ءار ءوڭىرى ءوزىن جەكە-جەكە تانىستىرادى دەگەن شەشىم كەزدەيسوق قابىلدانعان جوق. ءار ءوڭىردىڭ ەنەرگەتيكالىق دامۋ تاريحى وزگەشە. ايتالىق, توسكانا گەوتەرمالدى كوزدەرگە باي. يتاليانىڭ سولتۇستىگى سۋ ەنەرگەتيكاسىن بەلسەندى تۇردە دامىتۋدا. ال سيتسيليا – يتاليانىڭ كۇنى ىسپەتتى. وڭىرلەردى جۇمىلدىرۋ شەشىمىمىز ءار ءوڭىردىڭ ۇلتتىق ەنەرگەتيكالىق ساياساتقا وزىندىك ناقتى ۇلەسىن قوسۋىنا نەگىزدەلگەن, – دەدى راۆانيان مىرزا.
گۇلدانا تالعاتقىزى
