جازعى دەمالىستا مەكتەپ وقۋشىلارى مەن ستۋدەنتتەر بوس جۇرمەي, جۇمىسقا ورنالاسۋدىڭ قامىنا كىرىسەدى. الايدا اياقتالعان وقۋدى كۋالاندىراتىن ديپلومنىڭ جوقتىعىنان جۇمىس وڭايلىقپەن تابىلا قويمايدى. ال, جاستار ۋاقىتىن ءتيىمدى ۇيىمداستىرۋ ماقساتىندا جۇزەگە اسىپ جاتقان يگى جوبالار جوق ەمەس. تەك ونى كوپشىلىگى بىلە بەرمەيدى. سونىڭ ءبىرى – «جاستارعا ارنالعان قوعامدىق جۇمىس» باعدارلاماسى.
قالا اكىمدىگىنىڭ قولداۋىمەن جۇمىسپەن قامتۋ جانە الەۋمەتتىك باعدارلامالار باسقارماسى وسى شارانى جىل سايىن وتكىزىپ كەلەدى. اسىرەسە, جاز ايلارىندا بەلسەندىلىك ەرەكشە ارتاتىن كورىنەدى. تارقاتىپ ايتار بولساق, ۇيىمداستىرۋشىلار بايلانىس ورناتقان ورگاندار ارقىلى جۇمىس ىزدەۋشىلەردى مەملەكەتتىك قىزمەتكە ورنالاستىرادى. اكىمدىك بولگەن بيۋدجەت ارقىلى 26500 تەڭگە كولەمىندەگى جالاقىسىن دا وزدەرى تولەيدى. ال جۇمىس ۋاقىتى – كۇنىنە 4 ساعات. «ولار ۆولونتەر, كۋرەر سياقتى قوعامدىق جۇمىستارعا جۇمىلدىرىلادى. ارداگەرلەر كەڭەسىنە دە قۋانا-قۋانا سۇرانىپ جاتىر جاستارىمىز. قازىردىڭ وزىندە 107 ادامدى جۇمىسقا تۇرعىزدىق, ءالى 450 بوس ورىن بار. مۇنداي مۇمكىندىكتى 16 جاستان باستاپ پايدالانۋعا بولادى. ءويتكەنى, بانكتە ەسەپشوت اشۋ ءۇشىن جەكە كۋالىك بولۋى كەرەك. سونداي-اق, زەينەتاقى قورىنا دا اقشا ءتۇسىپ تۇرادى. جەكە كۋالىك, وقۋ ورنى مەن مەكەن-جاي انىقتاماسى, كامەلەتكە تولماعانداردىڭ اتا-اناسىنان جازباشا رۇقسات تالاپ ەتىلەدى» دەيدى باسقارما باسشىسىنىڭ ورىنباسارى ولگا يۋرەۆنا. باعدارلاما بويىنشا 6 اي بويى جۇمىس ىستەۋگە بولادى. وقۋ ۋاقىتى ەسكەرىلەدى. ياعني, ەكەۋىنىڭ ءبىر-بىرىنە كەدەرگى بولماۋى – باستى نازاردا.
ءمادينا جاقىپ
