ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ كامەرالىق حورى ءوزىنىڭ ءحىح كونتسەرتتىك ماۋسىمىن «Sounds of World» كونتسەرتىمەن اياقتادى. بۇل كەش «استانا وپەرا» تەاترىنىڭ ك.بايسەيىتوۆا اتىنداعى كامەرالىق زالىندا ءوتتى.
كونتسەرتتە قازاقتىڭ, ازەربايجاننىڭ, تۇرىكتىڭ, تۇرىكمەننىڭ جانە گەنري ءمانچينيدىڭ (اقش), يوزەف سۆيدەردىڭ (پولشا), كارل دجەنكينستىڭ (ۇلىبريتانيا) تانىمال شىعارمالارى, باسقا دا تۋىندىلار ورىندالدى. تۇپنۇسقا تىلدە شىرقالعان شىعارمالار ادامزاتتىڭ ماحابباتقا, سۇلۋلىققا, ءۇمىت پەن بەيبىتشىلىككە, ماڭگىلىك قۇندىلىقتارعا دەگەن ۇمتىلىسىن بەينەلەدى.
كەشتە حالىقارالىق جانە رەسپۋبليكالىق بايقاۋلاردىڭ لاۋرەاتتارى ينديرا ايتبەرگەن, لاۋرا قاراباي جەكە ونەر كورسەتتى. ديريجەر – كامەرالىق حوردىڭ كوركەمدىك جەتەكشىسى جانە باس ديريجەرى, قازاقستاننىڭ ەڭبەك سىڭىرگەن قايراتكەرى, پروفەسسور گۇلميرا قۇتتىباداموۆا. سونىمەن قاتار ديريجەر ەرجان سانسىزباەۆ, حورمەيستەر دانارا تاشاتوۆا, كونتسەرتمەيستەر گۇلدەن بازىكەن كونتسەرتتىڭ وتۋىنە اتسالىستى.
اسەماي ەرلانقىزى, ءال-فارابي اتىنداعى
قازاق ۇلتتىق ۋنيۆەرسيتەتىنىڭ ستۋدەنتى
