10 قاڭتار كۇنى وتەتىن قازاقستان رەسپۋبليكاسى پارلامەنتى ءماجىلىسى جانە ءماسليحات دەپۋتاتتارىنىڭ سايلاۋىندا COVID-19 ىندەتىنەن قورعانۋدىڭ ءتيىستى شارالارى تولىقتاي ساقتالادى.
– سايلاۋ پروتسەسىنە قاتىسۋشىلار الەۋمەتتىك اراقاشىقتىقتى ۇستاپ, بەتپەردە تاعۋى ءتيىس. كوميسسيا مۇشەلەرى, باقىلاۋشىلار مەديتسينالىق قولعاپتار كيۋگە مىندەتتى. ولار ارنايى ساقتاندىرعىش شىنىنىڭ ارتىندا وتىرادى. سايلاۋ ۋچاسكەسىندە قولدى دەزينفەكتسيالاۋعا ارنالعان انتيسەپتيكالىق قۇرالدارى ورناتىلادى, – دەدى الماتى اۋدانىنداعى №309 سايلاۋ ۋچاسكەسىنىڭ توراعاسى باتىرحان جۇماباەۆ.
بيىلعى سايلاۋدىڭ تاعى ءبىر ەرەكشەلىگى – داۋىس بەرەتىن كابينالارعا پەردە تۇتىلماعان. ول دا كابينادا اۋا اعىسى پروتسەسى ەركىن اينالىپ تۇرۋى ءۇشىن قاجەت.
ۋچاسكە توراعاسى كەلۋشىلەردى قول الىسىپ امانداسۋدان نەمەسە باسقاداي جاناسىپ بايلانىسۋدان ساقتانۋ كەرەكتىگىن ايتادى. داۋىس بەرۋشىلەر, سونداي-اق وزدەرىمەن بىرگە جەكە اۆتوقالامدارىن الا كەلۋلەرى قاجەت. سايلاۋ ۋچاسكەسىندە مەزگىل-مەزگىل ىلعالدى تازالاۋ جۇرگىزىلىپ تۇرادى. ەگەر سايلاۋعا قاتىسۋشى كۆي-دەن ەمدەلىپ, كارانتيندە بولسا, ول جونىندە كوميسسيا مۇشەلەرىنە الدىن الا ەسكەرتۋى ءتيىس.
COVID-19 تارالۋ قارقىنى بويىنشا «قىزىل» جانە «سارى ايماقتاردا» ورنالاسقان وڭىرلەردە سايلاۋ كوميسسيالارىنىڭ بارلىق مۇشەسى, سەنىم بىلدىرىلگەن ادامدار, بايقاۋشىلار سايلاۋ وتكىزۋ باستالعانعا دەيىن 5 تاۋلىكتەن ەرتە ەمەس ۋاقىتتا پتر-تەست تاپسىرۋى ءتيىس. ۋچاسكەگە زەرتحانالىق تەكسەرۋدىڭ وڭ ناتيجەسى بار ادامدار جىبەرىلمەيدى.
– قازىرگى كۇنى ءبىزدىڭ قىزمەتكەرلەرىمىز تۇرعىندارعا ءتىزىم بويىنشا سايلاۋعا شاقىرتۋلار تاراتىپ ءجۇر. پيك-تەرمەن بىرلەسىپ اۋلالاردا سايلاۋعا قاتىستى اقپاراتتار ءىلىپ جاتىرمىز, – دەدى باتىرحان جۇماباەۆ.