«تايدىڭ مىنگەنى, بالانىڭ جۇمساعانى بىلىنبەيدى» دەگەن ءتامسىل كەيدە ۋچاسكەلىك پوليتسيا وكىلدەرىنە قاراتا ايتىلعانداي كورىنەدى. سەبەبى پوليتسيانىڭ بارلىق «قارا جۇمىسىن» ۋچاسكەلىك پوليتسيا قىزمەتكەرلەرى اتقارادى دەسەك, اسىرا سىلتەگەندىك بولماس.
ەلباسىنىڭ «ادامدار پوليتسيا قىزمەتكەرلەرىن وزدەرىنىڭ قورعاۋشىسى رەتىندە تانىپ, ءوز قاۋىپسىزدىكتەرىن سەزىنۋلەرى ءتيىس» دەگەن ءسوزى حالىق الدىندا ادال قىزمەت ەتۋگە انت بەرگەن ءاربىر ءتارتىپ ساقشىسىنا ۇلكەن جاۋاپكەرشىلىك جۇكتەيدى. نۇر-سۇلتان قالاسىنىڭ پوليتسيا دەپارتامەنتى ۋچاسكەلىك پوليتسيا قىزمەتكەرلەرى وسى ۇدەدەن شىعۋ جولىندا كۇرەسىپ كەلەدى. پوليتسيا قىزمەتكەرىنىڭ مىندەتى زاڭدى ادام قۇقىعىنىڭ ساقتالۋىن قاداعالاۋ, قىلمىستىڭ الدىن الۋ بولسا, ەلوردالىق ۋچاسكەلىك پوليتسەيلەر قوعامدىق ءتارتىپتى ساقتاۋ, قىلمىستىڭ جولىن كەسۋ, حالىق پەن مەملەكەتتىڭ قاۋىپسىزدىگىن قامتاماسىز ەتۋ جولىندا العى شەپتەن كورىنىپ كەلەدى.
ەلىمىزدىڭ باس قالاسىندا 32 ۋچاسكەلىك پوليتسيا تىرەك پۋنكتى جۇيەلى جۇمىس ىستەسە, وندا 309 پوليتسيا قىزمەتكەرى ەڭبەك اتقارادى. ۇرى-قارىدان, بۇزاقىدان, قىلمىسكەردەن زاپا شەككەن تۇرعىنداردىڭ بارلىعى دەرلىك وسىندا كەلىپ ارىز-شاعىمدارىن ايتىپ جاتادى. ونىڭ سىرتىندا تۇرمىستىق جانجال, وتباسىلىق كەلىسپەۋشىلىك, كورشىلەرمەن تىلگە كەلۋ, اعايىنمەن جاعا جىرتىسۋ سياقتى ءىرىلى-ۇساقتى كەلەڭسىز جايتتارعا بايلانىستى دا ۋاجدەر تىركەلەدى. كەم دەگەندە كۇنىنە 3-4 ارىز, ءتىپتى ودان دا كوپ تۇسەدى. ونىڭ سىرتىندا ەسەپتە تۇرعان تۇلعالاردى تەكسەرىپ, ءىىم №1095 بۇيرىعىنا سايكەس جارتى جىلدا ءبىر رەت ءۇي-ءۇيدى ارالاپ, ءتۇسىندىرۋ جۇمىستارىن جۇرگىزەدى. تۇرعىندارمەن تانىسىپ, ءتيىستى اقپارات قالدىرىپ جاتادى.
ارينە, ومىردە قاتەلەسۋ مەن شالت باسۋلار بولىپ جاتۋى – زاڭدىلىق. وسىندايدا ۋچاسكەلىك پوليتسيا قىزمەتكەرلەرى ار-وجداننىڭ تازالىعىن كورسەتىپ, قاتەلىگىڭدى تۇزەۋگە اقىل-كەڭەس بەرىپ تە جاتادى. ال بۇل – كەز كەلگەننىڭ قولىنان كەلە بەرمەيتىن ءىس.
نۇر-سۇلتان قالاسى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىنىڭ ۋچاسكەلىك پوليتسيا ينسپەكتورى جۇمىسىن ۇيىمداستىرۋ ءبولىمىنىڭ باستىعى, پوليتسيا پودپولكوۆنيگى ازامات سادىقوۆ «پوليتسيا قىزمەتكەرىنىڭ باستى ۇستانىمى – قانداي قيىندىقتار, كەدەرگىلەر بولسا دا شىداۋ. جۇمىستى وڭتايلاندىرۋ ماقساتىندا تولىقتاي تسيفرلاندىرۋعا كوشىپ جاتقان جايىمىز بار. بۇرىنعىداي قاعازباستىلىق جوق. ۋچاسكەلىك پوليتسيا قىزمەتكەرلەرىنە پلانشەت ءبولىنىپ, بارلىق اقپارات سوندا جازىلعان. اكىمشىلىك حاتتامانىڭ 95 پايىزى پلانشەتپەن تولتىرىلادى. بەينە تىركەۋ قۇرالى, راتسيامەن دە تولىقتاي قامتاماسىز ەتىلگەن» دەدى بىزبەن اڭگىمەسىندە.
قايراتتىلىق, جىگەرلىلىك, قاجىرلىلىق, قۋاتتىلىق, مىقتىلىقتى سەرىك ەتكەن ءتارتىپ ساقشىلارى اراسىندا مامان تاپشىلىعى – جوقتىڭ قاسى. قىزمەتكەرلەردىڭ الەۋمەتتىك جاعدايى دا كەزەڭ-كەزەڭىمەن شەشىمىن تاۋىپ جاتقان سىڭايلى. كەلەسى ايدان باستاپ ەڭبەكاقىلارىنا دا ۇستەمە قوسىلاتىنى جونىندە جاعىمدى جاڭالىق كەلىپ جەتتى. جاقىندا ۋچاسكەلىك پوليتسەيلەردىڭ رەسپۋبليكالىق سلەتى وتەدى. وعان ۇزدىك شىققاندار ىرىكتەلىپ, ارنايى ماراپاتقا يە بولماق.
ءيا, ءتارتىپتى ساقتاۋ ءۇشىن زاڭنان مارتەبەلى ەشتەڭە جوق. سوندىقتان ءار ءتارتىپ ساقشىسىنان ادىلدىك پەن كاسىبيلىكتى ىزدەيتىنىمىز انىق. بۇل تۇرعىدا استانالىق ۋچاسكەلىك پوليتسيا قىزمەتكەرلەرى كاسىپكە ادالدىعىن تانىتىپ كەلەدى. «ەڭ باستىسى, باسپانا ماسەلەسى شەشىلسە, الاڭداۋعا ەش نەگىز جوق» دەيدى تىنىشتىق ساقشىلارى.
بەيبىت وسپان
