تاياۋدا قالاداعى №61 ورتا مەكتەپتە مۋزىكانت ۇستاز باقىت شامپەتوۆتىڭ شاكىرتتەرىمەن ەسەپ بەرۋ كونتسەرتى بولىپ ءوتتى. بۇل كىسىنىڭ ءومىربايانى تاعىلىمعا تولى. وتىز جىلدان اسا بالالارعا مۋزىكادان ساباق بەرىپ, ولاردىڭ بويىنا ونەر ءدانىن ەگىپ كەلەدى. ۇلاعاتتى ۇستازدىق قاسيەت تە ەكى ادامنىڭ بىرىنە قونا بەرمەيدى. شىنايى مۇعالىمنىڭ شاراپاتى كوپكە تيەدى. ءبىزدىڭ كەيىپكەرىمىز – وسىنداي ادام.
باقىت اعامىزدىڭ العاشقى ەڭبەك جولى قاراعاندى وبلىسىنان باستالدى. كەيىن ەلورداعا قونىس اۋدارىپ, شاھارداعى دارىندى بالالارعا ارنالعان №9 «زەردە» مامانداندىرىلعان مەكتەبى مەن №30 مەكتەپ-گيمنازياسىندا جۇمىس ىستەدى. بۇل جەردە دە ونەرلى ازاماتتىڭ ونەگەلى ىزدەرى قالدى. قازىر ول كىسى قىزمەت ىستەيتىن وقۋ ورداسىندا تالانتتى بالالار جەتەرلىك. ولاردىڭ اراسىندا رەسپۋبليكالىق, قالالىق بايقاۋلاردا جۇلدەلى ورىنعا قول جەتكىزگەندەر بار.
ەسەپ بەرۋ كونتسەرتىندە مۋزىكانتتىڭ ءوز قولىمەن قۇرعان «شابىت» دومبىراشىلار وركەسترى ونەر كورسەتتى. وركەستر قۇرامىنداعى بالالاردىڭ ءبارى دومبىرانى شەبەر مەڭگەرگەن. ولاردىڭ ورىنداۋىنداعى «بالبىراۋىن», «اداي», «جەلدىرمە», «القيسسا», «دايراباي» جانە «كوڭىلاشار» كۇيلەرى تىڭدارماننىڭ قۇلاق قۇرىشىن قاندىردى. سونداي-اق وركەستر جانىنان قۇرىلعان «شابىت» ءانسامبلىنىڭ ونەرى دە ءتانتى ەتتى. كەش بارىسىندا بەلگىلى ۇستاز, ونەرتانۋشى وسپان سۇلەيمەنوۆ ءسوز الىپ, باقىت شامپەتوۆتىڭ شىعارماشىلىعى تۋرالى جىلى لەبىزىن ءبىلدىردى.
– مەن باقىتتى ءبىرازدان بەرى بىلەمىن. جاقسى مۋزىكانت. ول – ۇستازدىق جولىن ونەرمەن ۇشتاستىرا بىلگەن ازامات. ونىڭ بالالاردى مۋزىكاعا باۋلىپ جۇرگەن ەڭبەگىن ەرەكشە ايتسام دەيمىن. بۇگىن وسى جەتكىنشەكتەرگە كوڭىلىم تولىپ وتىر. قازاقتىڭ قارا دومبىراسىنىڭ قاسيەتىن سەزىنگەن بالانىڭ بولاشاعىنان كوپ ءۇمىت كۇتەمىن, – دەدى ول. سونداي-اق كومپوزيتور شولپان قورعانبەك تە بالالاردىڭ ونەرىن جوعارى باعالادى. كونتسەرتتە باقىت اعانىڭ ءوزى دە شاكىرتتەرىمەن كۇمبىرلەتىپ كۇي توكتى. ونەر جولىنداعى ەسىنەن كەتپەس ساتتەرىن ءسوز ەتتى.
– ەلورداعا العاش كەلىپ, №30 مەكتەپ-گيمنازياسىندا ەڭبەك ەتىپ جۇرگەندە وزگە ۇلت وكىلدەرىنىڭ بالالارى دومبىرا ۇيىرمەسىنە قاتىستى. ولارعا دا جان سالىپ دومبىرانىڭ قىر-سىرىن ۇيرەتتىم. ءبىر تاتار قىزى قالالىق بايقاۋدا توپ جارىپ, مەرەيىمدى اسىردى. مەن ءوز ءومىرىمدى ونەرسىز ەلەستەتە المايمىن. ءاربىر شاكىرتىمدى بالامداي كورەمىن. قازاقتا «ۇستازدان شاكىرت وزار» دەگەن ءسوز بار. ەگەر مەنەن شاكىرتىم وزىپ جاتسا قۋانامىن, – دەيدى ونەرپاز ۇستاز.
انەل جارىلعاسىنقىزى
