نۇر-سۇلتان قالاسى ءماسليحاتىنىڭ قۇرىلىس, ەكونوميكا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ وتىرىسى ءوتتى.
وتىرىستا قالالىق قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى مۋسا تاناباەۆ «نۇر-سۇلتان قالاسى بويىنشا قورشاعان ورتاعا ەميسسيا ءۇشىن تولەماقى ستاۆكالارىن بەكىتۋ تۋرالى» ءماسليحات شەشىمىنىڭ جوباسىن ۇسىندى.
باس قالانىڭ ەكولوگيالىق ورتاسىن قورعاۋ جانە قالا بيۋدجەتىن ارتتىرۋ ماقساتىندا ازىرلەنگەن بۇل جوبادا قالاعا قاراستى وڭىرلەردە ەميسسيا ءۇشىن تولەماقى ستاۆكالارىن كوتەرۋ ماسەلەسى ءسوز بولدى. قر سالىق كودەكسىنە سايكەس جەرگىلىكتى ورگانداردىڭ ەميسسيا ءۇشىن تولەماقى ستاۆكالارىن 2 ەسەگە دەيىن كوتەرۋگە قۇقىعى بارىن العا تارتقان باسقارما باسشىسى بۇل جوبا تەك قانا اۆتوكولىكتەردىڭ زياندى گاز شىعاراتىنى ءۇشىن تولەماقىنى ءوسىرۋ مەن كەروسينگە تولەماقى ستاۆكالارىن قوسۋعا ارنالعانىن, قالعان تولەمدەردىڭ وزگەرىسسىز قالاتىنىن ايتتى.
ەرەكشە ايتا كەتەتىن ءبىر ءتۇيىن, بۇل وزگەرىستەر ءوز ەسەبىندە اۆتوكولىگى بار جەكەمەنشىك تاسىمالداۋ ۇجىمدارىمەن اينالىساتىن كوممۋنالدىق مەكەمەلەرگە قاتىستى. جەكە تۇلعالار مەن جەكە كاسىپكەرلەر بۇل تولەمدى تولەۋگە مىندەتتى ەمەس.
