كەمەڭگەر كەكىلبايۇلى ەسكەرتكىشى اسقاقتادى

پرەزيدەنت قاسىم-جومارت توقاەۆ ءابىش كەكىلبايۇلى ەسكەرتكىشىنىڭ اشىلۋ راسىمىنە قاتىستى.

مەملەكەت باسشىسى اقتاۋ قالاسىنا جۇمىس ساپارمەن بارىپ, جازۋشى, قوعام جانە مەملەكەت قايراتكەرى ءابىش كەكىلبايدىڭ 80 جىلدىق مەرەيتويى اياسىندا ورناتىلعان ەسكەرتكىشىنىڭ اشىلۋ راسىمىنە قاتىستى. قاسىم-جومارت توقاەۆ قالامگەردىڭ ءمۇسىنىن سالتاناتتى تۇردە اشىپ بەردى.
تاۋ تۇلعالى تالانت, عۇلاما ويشىل ءابىش كەكىلبايۇلىنىڭ ەرەن ەڭبەگى قانداي قۇرمەتكە دە لا­يىق ەكەنىن ايتقان قاسىم-جومارت تو­قاەۆ زاڭعار جازۋشى, اسا كورنەكتى مەملەكەت جانە قوعام قايراتكەرىنىڭ رۋحىنا تاعزىم ەتۋ تەك ماڭعىستاۋ ءوڭىرىنىڭ عانا ەمەس, بۇكىل ەلىمىز ءۇشىن ماڭىزدى وقيعا دەپ باعالادى.
– ءبىز بۇگىن رۋحىن ۇلىقتاپ وتىر­عان ءابىش كەكىلبايۇلى – ادامزاتتىق بولمىستىڭ جوعارى دەڭگەيىنە كوتەرىلگەن ءبىرتۋار تۇلعا, قازاق حالقىنىڭ ۇلى پەرزەنتى. حالقىمىزدىڭ ماقتانىشىنا اينالعان ازاماتتاردىڭ ەسىمىن جادىمىزدان شىعارماۋ – بارشامىزدىڭ پارىزىمىز. ەلباسىنىڭ «شىركىن-اي, وسىنداي قازاقتار كوبىرەك بولسا ەكەن» دەپ ءابىش اعاعا ريزاشىلىق ءبىلدىرۋى تەگىن ەمەس. زيالى قاۋىم وعان ايرىقشا قۇرمەت كورسەتىپ, «قازاقتىڭ تاڭدايى» دەپ اتادى, – دەدى قازاقستان پرەزيدەنتى.
مەملەكەت باسشىسى «قازاقستاننىڭ ەڭبەك ەرى» اتاعىنا يە بولعان تۇڭعىش قالامگەردىڭ ادەبيەت الەمىنە كەلگەننەن باستاپ ۇلتتىق سانانى ساقتاۋ ءۇشىن مول ۇلەس قوسقانىنا, انا ءتىلىمىزدى, سالت-ءداستۇرىمىزدى جانە ءتول مادەنيەتىمىزدى دارىپتەپ, حالقىنا ادال قىزمەت ەتكەنىنە توقتالدى. ۇلتتىق بولمىس پەن ۇلتتىق رۋح كە­كىلبايۇلى شىعارماشىلىعىنىڭ دىڭگەگىنە اينالعانىن ايتتى.
قازاقستان پرەزيدەنتى ءسوز سوڭىندا ءابىش كەكىلبايۇلىنىڭ «ۇرپاعىنا يە بولا الماعان جۇرت ۇلتتىقتان ايىرىلادى» دەگەن ءسوزى ءاردايىم ەسىمىزدە تۇراتىنىن ايتىپ, جازۋشىنىڭ مول مۇراسى, ونەگەلى تاعىلىمى وسى ماقساتقا قىزمەت ەتە بەرەتىنىنە سەنىم ءبىلدىردى.