قازاق ۇلتتىق ونەر ۋنيۆەرسيتەتىنىڭ ورگان زالىندا جەڭىستىڭ 67 جىلدىعىنا ارنالعان «كەستەلى ورامال» اتتى مەرەكەلىك كونتسەرت بولدى. اتالمىش سالتاناتتى شارا استانا قالاسىنىڭ مەملەكەتتىك فيلارمونياسىنداعى «سارىارقا» ۇلت اسپاپتار ءانسامبلىنىڭ مۇرىندىق بولۋىمەن جۇزەگە استى. ءانسامبلدىڭ كوركەمدىك جەتەكشىسى مادەنيەت قايراتكەرى نۇرلان ءحامزيننىڭ باسقارۋىمەن سوعىس جىلدارىنا ارنالعان كونتسەرت بەرىلدى.
اتى ايتىپ تۇرعانداي-اق, كەشتىڭ ءون بويىندا «كەستەلى ورامال» سىندى سوعىس جىلدارىنىڭ تاۋقىمەتىن سيپاتتايتىن قوڭىر مۇڭعا تولى ەسكى اندەر شىرقالىپ, قارا دومبىرانىڭ شاناعىنان جۇرەكتى شىمىرلاتاتىن اۋەزدى كۇيلەر توگىلدى. اتاقتى كومپوزيتور مۇقان تولەباەۆتىڭ بۇل ءانىن قازاقستان جاستار وداعى سىيلىعىنىڭ يەگەرى, دارىندى ءانشى نۇراي تاناباەۆ ورىندادى. كەشكە ارنايى شاقىرتىلعان سوعىس ارداگەرلەرى اياق استىنان كۇرت بۇزىلعان اۋا-رايىنىڭ قولايسىزدىعىنا قاراماستان, وتە كوپ جينالدى. ۇكىلى ىبىرايدىڭ «گاككۋىن», ءبىرجان سالدىڭ «ون ساۋساعىن» ورىنداعاندا ءبىر مايدانگەر قارتتىڭ ريزا بولعانى سونشا, ساحنادا ءان سالىپ تۇرعان قايرات بايبوسىنوۆ اعامىزدىڭ قولىن الىپ, اق باتاسىن بەردى. جاقسىگەلدى سەيىلوۆتىڭ «انا تۋرالى باللاداسى» شىرقالعاندا كوزىندەگى ءمولت-ءمولت ەتكەن جاسىن ءداس ورامالىمەن سۇرتكىشتەگەن كورەرمەندەر دە از بولمادى. «توس مەنى, توس» ءانىن سالعان قر ەڭبەك سىڭىرگەن قايراتكەرى تۇياقباي اسانباەۆ تا كومەسكىلەنىپ بارا جاتقان سوعىستىڭ قيامەت كۇندەرىن تاعى ءبىر ەلەستەتىپ وتكەندەي بولدى. قاسىم امانجولوۆتىڭ «داريعا, سول قىز» كۇيىن تارتقان سەكەن سىزدىق ساعىنىش پەرنەلەرىن ءدوپ باستى. دينانىڭ كۇيى «جەڭىستى» شەرتكەن ەرجان توقسابانوۆ تا كۇيدى ورىنداۋعا جانىن سالىپ باقتى. قر ەڭبەك سىڭىرگەن قايراتكەرى گۇلزيرا بوكەيحاننىڭ ورىنداۋىنداعى باقىتجان بايقاداموۆتىڭ «سۇيگەن ساۋلەم» ءانى دە قاريالاردى بەيجاي قالدىرمادى.
باقىت تۇرسىنجانقىزى
