بەيسەنبى كۇنى مەملەكەت باسشىسى نۇرسۇلتان نازارباەۆ قازاقستانعا رەسمي ساپارمەن كەلگەن قىرعىز رەسپۋبليكاسىنىڭ پرەزيدەنتى المازبەك اتامباەۆپەن كەزدەستى. بۇل – قىرعىزدىڭ جاڭا پرەزيدەنتىنىڭ بىزدىڭ ەلگە العاش كەلۋى. قوس ەل باسشىسىنىڭ قاتىسۋىمەن اقوردادا رەسمي راسىمنەن سوڭ شاعىن جانە كەڭەيتىلگەن قۇرامدا كەلىسسوزدەر ءوتىپ, وندا بىرقاتار كەلىسىمدەر قابىلداندى.
ەكى ەلدىڭ باسشىلارى ءوزارا ءىس-قيمىلدىڭ وزەكتى ماسەلەسىن تالقىلادى. اتاپ ايتساق, ولار ساۋدا-ەكونوميكالىق, ايماقتىق قاۋىپسىزدىك پەن تۇراقتىلىقتى نىعايتۋ جانە مادەني-گۋمانيتارلىق ىنتىماقتاستىقتى ودان ءارى دامىتۋ جونىندە پىكىر الماستى.
رەسمي وتىرىستان سوڭ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن قىرعىز رەسپۋبليكاسىنىڭ پرەزيدەنتى المازبەك اتامباەۆ جۋرناليستەر الدىندا ءسوز سويلەدى. بريفينگتە قوس ەلدىڭ باسشىلارى ەنەرگەتيكا, اۋىل شارۋاشىلىعى, كولىك جانە كوممۋنيكاتسيا, كەن بايىتۋ جانە وڭدەۋ ونەركاسىبى, تۋريزم جانە وزگە سالالارداعى ءوزارا ءتيىمدى ىنتىماقتاستىقتى جانداندىرۋعا كەلىسكەنىن مالىمدەدى.
ەلباسى ءوز سوزىندە قازاقستان 1991-2011 جىلدار ارالىعىندا قىرعىزستان ەكونوميكاسىنا 1 ميللياردتان استام اقش دوللارى كولەمىندە ينۆەستيتسيا سالعانىن ايتتى. سونداي-اق, ەكى ەل اراسىنداعى تاۋار اينالىمى 2011 جىلى 750 ميلليوننان استام دوللاردى قۇراعانى بەلگىلى بولدى. بۇل كورسەتكىش 2010 جىلمەن سالىستىرعاندا 27 پايىزعا ارتقان.
ەكى ەلدىڭ ىنتىماقتاستىعىن نىعايتا تۇسەتىن تاعى ءبىر جاڭالىق – الداعى ۋاقىتتا قازاق-قىرعىز ينۆەستيتسيالىق قورى جۇمىسىن باستاماق. سونىمەن بىرگە, بۇدان بىلاي قىرعىزستان ازاماتتارى قازاقستاندا 90 تاۋلىك بولا الادى. تاياۋدا قازاق-قىرعىز شەكاراسىندا «كەگەن-قارقارا» وتكىزۋ بەكەتى اشىلادى. بىرەر جىل بۇرىن قىرعىز ەلىنەن كونتراباندالىق جولمەن قارۋ-جاراق تاسىمالدانعان بەكەتتى ەل بيلىگى جاۋىپ تاستاعان بولاتىن. سونىمەن بىرگە, قىرعىزستاننىڭ كەدەن وداعى مەن قازاقستان, رەسەي جانە بەلارۋس بىرىڭعاي ەكونوميكالىق كەڭىستىگىنە قوسىلۋ ماسەلەسى قارالاتىن بەلگىلى بولدى. بۇل رەتتە قازاق بيلىگى ايىرقالپاقتى اعايىنعا وداققا قوسىلۋ كەزىندە قۇجاتتاردى راسىمدەۋگە كومەكتەسەتىنىن دە جەتكىزدى.
ەكى ەلدىڭ مادەني قاتىناسى دا نازاردان تىس قالمادى. بيىل قازاقستان رەسپۋبليكاسى مەن قىرعىز رەسپۋبليكاسى اراسىنداعى ديپلوماتيالىق قاتىناستاردىڭ ورناعانىنا 20 جىل تولادى. وسى رەتتە نۇرسۇلتان نازارباەۆ پەن المازبەك اتامباەۆ بىشكەكتە ابايدىڭ ەسكەرتكىشىن ورناتۋ جانە ەكى ەلدىڭ استاناسىندا شوقان ءۋاليحانوۆ پەن شىڭعىس ايتماتوۆ اتتارىنا كوشە بەرۋ تۋرالى شەشىم قابىلدادى.
اينۇر شوشاەۆا
