استانا اكىمدىگىندە قالا اكىمىنىڭ ورىنباسارى ەرمەك امانشاەۆتىڭ توراعالىعىمەن «رۋحاني جاڭعىرۋ» باعدارلاماسىنىڭ جۇزەگە اسۋى بويىنشا جينالىس ءوتتى. اكىمدىكتىڭ رەسمي سايتىنداعى مالىمەتكە سۇيەنسەك, باعدارلاما جوبالارىنىڭ ءبىرى – قازاقستان استاناسىنىڭ تاريحي-مادەني مۇرالارىن بىرىكتىرەتىن «كيەلى استانا» كارتاسى بولماق.
ەرمەك امانشاەۆتىڭ ايتۋىنشا, استانا ولكەسىندە كونە تۇرىك كەزەڭىنە جاتاتىن ارحەولوگيالىق نىساندار بار. دەمەك, بۇل ەلورداداعى بارلىق ەسكەرتكىشتەر «كيەلى كارتاعا» ەنۋى كەرەك جانە تاريحي-مادەني مۇرالاردى تەرەڭىنەن زەرتتەۋ ءۇشىن جۇمىس توبى قۇرىلۋى ءتيىس دەگەندى بىلدىرەدى. ونىڭ قۇرامىندا ءبىزدىڭ عالىمدار, ارحەولوگتار, تاريحشىلار, ۇكىمەتتىك ەمەس جانە جاستار ۇيىمدارىنىڭ وكىلدەرى بولادى.
– جالپى, «كيەلى استانا» ەلوردا ءومىرىنىڭ بىرنەشە كومپونەنتتەرىن بىرىكتىرەدى. ويتكەنى كيەلى كارتا – بۇل ءبىر جاعىنان, ولكە تاريحىن زەرتتەۋدىڭ باعا جەتپەس كوزى, ەكىنشىدەن, ءوز جەرىنە, ەلورداسىنا دەگەن سىيلاستىق پەن پاتريوتتىق سەزىمنىڭ قالىپتاسۋىنا نەگىز بولادى. ۇشىنشىدەن, تۋريستىك كلاستەردىڭ كرەاتيۆتى قۇرامى بولۋى كەرەك. سوندىقتان دا «رۋحاني جاڭعىرۋ» باعدارلاماسى بويىنشا جۇمىستاردى جانداندىرۋ قاجەت, – دەدى ەرمەك ءامىرحانۇلى.
مۇنداي شارالاردىڭ ىشىندە «بوزوق» قالاشىعىنا مادەني-عىلىمي ەكسپەديتسيا جاساۋ, جاس ولكەتانۋشىلاردىڭ قالالىق سلەتى مەن فورۋمى, ءبىلىم مەكەمەلەرىندە «تۋعان جەر – رۋحاني جاڭعىرۋ» تاقىرىبىندا سىنىپ جانە كۋراتورلىق ساعاتتار وتكىزۋ, تاعى دا باسقالار.
سونىمەن قاتار جينالىستا استانانىڭ جاس پاتريوتتار كلۋبى مەن قالانىڭ «رۋحاني جاڭعىرۋ» شىعارماشىلىق ينتەلليگەنتسياسىنىڭ كەڭەسىن قۇرۋ ايتىلدى. توپ قۇرامىندا مادەنيەتتانۋشىلار, تاريحشىلار, ونەر قايراتكەرلەرى, ارحەولوگتار جانە قالانىڭ تالانتتى, جاسامپاز جاستارى بولادى.
سەرىك جولداسباي
