كليماتتىڭ وزگەرۋى – قاۋىپ
ەلوردادا «استانانىڭ تومەن كومىرتەكتى دامۋعا كوشۋىنىڭ ءادىسناماسى مەن تەتىكتەرى» اتتى تاقىرىپتا سەمينار ءوتتى. وعان قالا اكىمىنىڭ ورىنباسارى قوسمان ايتمۇحامەتوۆ قاتىستى.
جيىننىڭ ماقساتى – باس شاھاردىڭ تومەن كومىرتەكتى دامۋعا كوشۋ ستراتەگياسىنىڭ ءادىسناماسىن ازىرلەۋ تۋرالى جۇرتشىلىقتى حاباردار ەتۋ جانە پاريج كليماتتىق كەلىسىمى اياسىندا ىسكە اسىرۋ تەتىكتەرىن تالقىلاۋ كوزدەلگەن.
سەميناردى ەلوردا اكىمىنىڭ ورىنباسارى قوسمان ايتمۇحامەتوۆ اشىپ, ول ءوز سوزىندە كليماتتىڭ وزگەرۋى قالانىڭ قالىپتى ومىرىنە ۇلكەن قاۋىپ تۋدىراتىنىن جەتكىزدى.
– استانا اكىمدىگى پارنيكتىك گازدار مەن قالدىقتار شىعارىندىلارىن ازايتۋ, ەنەرگيا تيىمدىلىگىن ارتتىرۋ جانە حالىققا ەكولوگيالىق ءبىلىم بەرۋ ءۇشىن ۇزاق مەرزىمدى ستراتەگيالىق شارالار ازىرلەۋ تۋرالى شەشىم قابىلدادى. بۇگىندە قالاداعى جەو-2-دا كەڭەيتۋ جۇمىستارى جۇرگىزىلۋدە. بىلتىر №2 قازاندىق ىسكە قوسىلىپ, قالدىقتار شىعارىندىلاردىڭ كولەمى ازايدى. بۇل باعىت تا جۇمىس ءالى دە جالعاسادى. جۋىردا وسى سالا بويىنشا ءۇش جىلعا ارنالعان ءىس-شارالار جوسپارى بەكىتىلەدى. بىرلەسىپ جۇمىس ىستەۋ ءۇشىن وعان قوعامدىق بىرلەستىكتەر مەن حالىقارالىق ۇيىمداردى قوسىپ وتىرمىز. قازىر قالاعا سۇيىق وتىن تارتۋ ماسەلەسى جان-جاقتى تالقىلانۋدا. ءبىز «قازترانسگازايماق» كومپانياسىمەن مەموراندۋمعا كەلىپ, اتالعان اكتسيونەرلىك قوعامنىڭ ينۆەستيتسيالىق ەسەبىنەن 2019 جىلدىڭ سوڭىنا دەيىن گاز قۇبىرىن وتكىزسەك دەپ وتىرمىز. ەڭ الدىمەن جەو-1 جانە جەو-2-ءنىڭ ىستىق سۋ قازاندىقتارىن گازعا اۋىستىرامىز. ودان كەيىن جەو-1 اۋدانىندا ورنالاسقان كوكتال-1, كوكتال-2 جانە ن.تىلەنديەۆ كوشەسىنىڭ ءبىر بولىگىن سۇيىق وتىنمەن قامتاماسىز ەتەمىز. مۇنىڭ بارلىعى ەكولوگيانىڭ جاقسارۋىنا سەپتىگى تيەدى دەپ ويلايمىن, – دەدى اكىم ورىنباسارى.
شارا اياسىندا قر ەنەرگەتيكا مينيسترلىگى ەكولوگيالىق رەتتەۋ جانە باقىلاۋ كوميتەتى توراعاسىنىڭ ورىنباسارى زۇلفىھار جولداسوۆ, ازيا دامۋ بانكىنىڭ وكىلى نا ۆون كيم, قازاقستان ەكولوگيالىق قاۋىمداستىعى پرەزيديۋمىنىڭ مۇشەسى سالتانات راقىمبەكوۆا ءسوز الىپ, ەلىمىزدەگى تومەن كومىرتەكتى دامۋعا كوشۋ شەڭبەرىندە ونىڭ دامۋ ستراتەگياسىن ازىرلەۋ, حالىقارالىق ۇيىمداردىڭ قارجىلاي جانە ساراپتامالىق كومەگى, شەشىمدەر مەن جوبالارعا ازاماتتىق قوعامنىڭ قاتىسۋىنىڭ ماڭىزدىلىعىن باسا اتاپ ءوتتى.
سونداي-اق, سەمينارعا الىستان ادەيى ات ارىتىپ كەلگەن ازيا دامۋ بانكى تۇراقتى دامۋ جانە كليمات بويىنشا مامانى فرەدەريك اسسەلاين, رەسەيدەگى جوعارعى ەكونوميكا مەكتەبى ورتالىعىنىڭ ديرەكتورى گەورگي سافونوۆ, كونراد ادەناۋەر اتىنداعى قوردىڭ قازاقستانداعى وكىلدىگىنىڭ جەتەكشىسى توماس حەلم قاتىسىپ, ءوز ويلارىن ورتاعا سالدى.
جيىن قورىتىندىسىندا قالالىق اكىمدىكتىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنا ازيا دامۋ بانكىنىڭ قولداۋىمەن ەلوردانىڭ تومەن كومىرتەكتى دامۋعا كوشۋ ستراتەگياسىنىڭ ءادىسناماسىن نەگىزدەۋ ءۇشىن حالىقارالىق جانە ۇلتتىق ساراپشىلاردان قۇرالعان جۇمىس توبىن قۇرۋ, ءماسليحات جانە قوعامدىق كەڭەسپەن بىرلەسىپ, باس شاھاردىڭ 2018-2021 جىلدارعا ارنالعان كەشەندى جوسپارىنىڭ جوباسىن تالقىلاۋعا قوعامدىق تىڭداۋلار ۇيىمداستىرۋ جايىندا ۇسىنىستار ايتىلدى.
ازامات ەسەنجول