ازىق-تۇلىكتىڭ باعاسىن تۇراقتاندىرۋ, ارنايى قورىن قالىپتاستىرۋ استانا سياقتى ۇلكەن قالادا ەڭ وزەكتى ماسەلە ەكەنى بەلگىلى. كۇننەن كۇنگە اۋقىمى كەڭەيىپ كەلە جاتقان قالانىڭ تۇرعىندارى دا وسە تۇسكەن. سوعان ساي كوكونىستى تۇتىنۋ مولشەرى دە ۇلعايدى. بۇرىن ەلوردادا كولەمى 60 مىڭ توننادان اساتىن جەتى قويما جۇمىس جاساپ كەلگەن ەدى. قالا حالقىنىڭ وسۋىنە بايلانىستى بۇگىندە ولاردىڭ سۇرانىستى وتەۋگە قاۋقارى جەتپەي بارادى. سول سەبەپتەن كولەمى 14,4 مىڭ توننا بولاتىن جاڭادان ءتورت كوكونىس قويماسىن سالۋ قولعا الىنعان بولاتىن.
بۇگىندە قويمانىڭ بىرەۋى پايدالانۋعا دايىن. قالعان ۇشەۋى الداعى جىلداردا كەزەڭ-كەزەڭىمەن پايدالانۋعا بەرىلەدى. بۇگىندە استاناداعى سەگىز كوكونىس قويماسى الەۋمەتتىك ماڭىزى بار ونىمدەردىڭ باعاسىن ۇستاپ تۇرۋعا ايتارلىقتاي سەپتىگىن تيگىزىپ تۇر. استانا قالاسى اۋىل شارۋاشىلىق باسقارماسىنىڭ باسشىسى اسەت قۇرمانعاليەۆتىڭ ايتۋىنشا, قويمادا ساقتالعان ونىمدەردىڭ باسىم بولىگى, نەگىزىنەن, «شاپاعات» كوممۋنالدىق بازارى ارقىلى ساتىلادى ەكەن. سونداي-اق, استانانىڭ ازىق-تۇلىك بەلدەۋىندە جۇمىس جاسايتىن مىڭعا جۋىق كاسىپورىنداردىڭ ونىمدەرى قالاداعى ون شاقتى ساۋدا پاۆيلوندارىندا شىعارىلادى. قويماعا ساقتاۋعا كەلەتىندەرى جوعارىدا ايتىپ وتكەن قويمالارعا ورنالاستىرىلادى.
– سوڭعى پايدالانۋعا بەرىلگەن قويما گوللانديالىق ساقتاۋ تەحنولوگياسى بويىنشا جۇمىس جاسايدى. مۇندا ەلىمىزدىڭ جەرگىلىكتى وندىرۋشىلەرىنەن كەلگەن كوكونىس پەن جەمىس-جيدەكتەر ساقتالادى. جالپى قويما ءارقايسىسىنىڭ سىيىمدىلىعى جەتى مىڭ توننا بولاتىن ءبولەك ورىنداردان تۇرادى. كوكونىستەرگە ارنايى كونتەينەرلەر بار. كوكونىستەر مەن جەمىس-جيدەكتەردى ساقتاۋعا ارنالعان 10 سەكتسيا بولسا, سونىڭ 6-ۋى توڭازىتقىش جابدىقتارىمەن جابدىقتالعان. ونداي سەكتسيادا ءتسيترۋستى جەمىستەر, قيار مەن قىزاناقتى ساقتاۋعا بولادى. كوكونىستەردىڭ تۇرلەرىنە قاراي ساقتاۋ تەمپەراتۋرالارى ءارتۇرلى, بىراق كوپشىلىگى 0°س-دەن اسپايدى, – دەيدى «امال 2009» جشس ديرەكتورىنىڭ ورىنباسارى تالعات ءابىلوۆ قويمانىڭ جۇمىسى جايىندا.
جاڭا قويمانىڭ ەرەكشەلىگى سول, ارنايى جابدىقتار ءار سەكتسياعا قاجەتتى تەمپەراتۋرانى تاڭداپ قويۋعا, سونىمەن قاتار ورىن-جايداعى اۋانىڭ ىلعالدىلىعىن باقىلاۋعا مۇمكىندىك بەرەدى ەكەن. بۇل بۇرىنعى ساقتاۋ تاسىلىنە قاراعاندا الدەقايدا ءتيىمدى. ماسەلەن, ودان بۇرىن پايدالانىلىپ كەلگەن قويمالاردا ءونىمنىڭ ءبىراز بولىگى كوپ ۋاقىت وتكەننەن كەيىن جارامسىز بولا باستاسا, جاڭا قويمادا ساقتالۋ مەرزىمى بۇرىنعىسىنان ۇزاقتاۋ. وعان قوسا, ءونىمنىڭ باسىم بولىگى ساپاسىن جويمايدى. وسىنداي قويمالاردىڭ تاعى ءبىر بولىگى الداعى جىلدارى پايدالانۋعا بەرىلگەندە, استانا حالقى تۇتىناتىن كوكونىس پەن جەمىس-جيدەك كولەمىن ءبىر جىلدان اسا ۋاقىت تولىق ساقتاۋعا مۇمكىندىك تۋادى. جالپى, بۇل باعىتتاعى قاجەتتىلىك جوسپار بويىنشا 2017 جىلى جابىلۋى ءتيىس.
مەڭدوللا شامۇراتوۆ
