قالا اكىمدىگى «ەحرو-2017» قوناقتارىنا ارناپ 20-دان استام سپورتتىق شارا دايىنداپ قويدى.
ماۋسىمنىڭ 24-27 ارالىعىندا «داۋلەت» سپورت كەشەنىندە كوركەم گيمناستيكادان ازيا چەمپيوناتى وتەدى. جارىسقا 15 ەلدەن كەلگەن ەڭ مىقتى دەگەن 150-گە جۋىق سپورتشى قاتىسادى. ال 1-2 شىلدەدە التىنشى كاراتە شينكيوكۋشينكايدان الەم چەمپيوناتى وتەدى. ەلورداعا ءتۇرلى مەملەكەتتەردەن 196 كاراتەشى جينالىپ, باق سىناسادى. اراعا ءبىر اپتا سالىپ, ەلوردادا تۇڭعىش رەت كاراتە-دو بويىنشا ازيا چەمپيوناتى ۇيىمداستىرىلماق. «ەحرو» كورمەسى اياسىندا الەمنىڭ ەڭ مىقتى مەرگەندەرى استاناعا ات باسىن بۇرادى. سەبەبى 3-14 تامىزدا «الاش» تاس جولىنىڭ بويىنداعى «ەلدورادو» اتۋ الاڭىندا سپورتينگ بويىنشا EXPO 5 ۇلكەن چەمپيوناتى, EXPO-2017 گران-پري حالىقارالىق ءتۋرنيرى جانە ستەند اتۋدان 7-ءشى ازيا چەمپيوناتى وتەدى.
كورمە اياسىندا شەتەلدىك مەيماندار قازاقتىڭ ۇلتتىق ويىندارىمەن جەتە تانىسۋعا مۇمكىندىك الادى. ماسەلەن, قازانات اتشابارىندا 20-28 تامىز ارالىعىندا كوكپاردان الەم چەمپيوناتى وتكىزىلەدى. ءۇش ايدىڭ ىشىندە توعىزقۇمالاقتان, بەلبەۋ كۇرەسىنەن, «الەم بارىسى» اتتى قازاق كۇرەسىنەن ءابسوليۋتتى الەم چەمپيوناتىنىڭ جالاۋى كوتەرىلەدى. سونداي-اق, 17 شىلدەدە تەننيستەن «پرەزيدەنت كۋبوگى-2017» حالىقارالىق ءتۋرنيرى باستالادى.
الەم نازارىن وزىنە اۋداراتىن ءدۇبىرلى دودالاردىڭ ءبىرى – «جىبەك جولى-2017» حالىقارالىق ءرالليى.
– ماسكەۋ – استانا – سيان باعىتتارى بويىنشا ءجۇرىپ وتەتىن كولىك كەرۋەنىن اسىعا كۇتەتىندەر كوپ. راللي اياسىندا ەلورداعا 500 سپورتتىق كولىك پەن 1,5 مىڭ قاتىسۋشى كەلەدى. «حان شاتىر» ساۋدا ورتالىعىندا جانكۇيەرلەر سپورتشىلارمەن فوتوعا ءتۇسىپ, تىلدەسە الادى, – دەدى ول.
جالپى, حالىقارالىق جارىستىڭ باستالۋى ماسكەۋدىڭ قىزىل الاڭىندا 7 ماۋسىمعا جوسپارلانعان. ال راللي مارافونى قىتايدىڭ ەڭ ەجەلگى استانالارىنىڭ ءبىرى – سيان قالاسىندا 22 شىلدەدە اياقتالادى دەپ كۇتىلۋدە.
گۇلدانا تالعاتقىزى
