كوكتەمدەي قۇلپىرعان…
«جاستار» سارايىندا قالانىڭ دامۋىنا سۇبەلى ۇلەسىن قوسقان استانالىق ايەلدەردى ۇلىقتاۋ ءراسىمى ءوتىپ, شارا ارتىنشا مەرەكەلىك كونتسەرتكە ۇلاستى. ناۋرىز مەرەكەسى قارساڭىندا استانا قالالىق ارداگەرلەر كەڭەسى اتالمىش شارانى جاقسى داستۇرگە اينالدىردى.
– شارا اياسىندا «جاستار» سارايىندا ەلوردامىزداعى كورنەكتى سۋرەتشىلەردىڭ كورمەسى قويىلىپ, شىعارماشىلىق ۇجىمداردىڭ كونتسەرتى ۇيىمداستىرىلۋدا. «كوكتەم جانە ايەلدەر» دەگەن اتاۋمەن جىل سايىن وتەتىن مەرەكەلىك كونتسەرتكە استانانىڭ ەڭ بەلسەندى دەگەن ارداگەرلەرىن شاقىرامىز, – دەپ ءتۇسىندىردى قالالىق ارداگەرلەر كەڭەسىنىڭ توراعاسى سانسىزباي ەسىلوۆ.
قوشەمەت پەن ماراپاتقا يە بولعان اسىل جانداردىڭ قاتارىندا ەلوردانىڭ ەڭسەسىن تىكتەگەن ءتۇرلى ماماندىق يەلەرى بار. ولاردىڭ ىشىندە اتاقتى ساۋىنشى, سوتسياليستىك ەڭبەك ەرى ساعيلا ەسەنجولوۆا, دەنساۋلىق ساقتاۋ سالاسىندا تالماي ەڭبەك ەتكەن, بۇگىندە استانا قالاسى دەنساۋلىق ساقتاۋ ارداگەرلەرى كەڭەسىنىڭ ءتورايىمى التىن سۇلەيمەنوۆا سىندى ءوز ءىسىنىڭ ۇزدىكتەرىنىڭ اتى اتالدى.
گۇلدانا تالعاتقىزى